Lirthei BS-IV register loh tan hmalak har

Transport Minister, TJ. Lalnuntluanga chuan lirthei BS-IV (Bharat Stage-IV) la ‘register’ loh awm chu State sawrkar thuneihna a nih loh avangin ‘register’ a nih theih nana hma lak zui a harsat thu a sawi.

Transport Minister hian nimin-a Lawngtlai DTO Office sak thar a tlawhna ah he thu hi sawiin, Supreme Court chuan BS-IV register nan March thla tawp thleng hun a hawn hnuah April thla tawp thleng a pawtsei leh a. Transport Department chuan hriattirna pawh zau taka siamin a puangzar a; hun tawp hnuah state sawrkar chuan tih theih a nei tawh lo tih sawiin, tuna ‘register’ hman loh la awm te chungchang chu central sawrkar thuneihna anih avangin tun maiah an tan kawng dap a har deuh thu leh a theih anga lo en zui a tum thu a sawi.

Law Minister ni bawk, TJ. Lalnuntluanga hian Lawngtlai DC, Shashanka Ala-i kawmin, COVID-19 vanga hmalakna hrang hrang te an sawidun a. Hemi hnu hian CJM Office tlawhin CJM, BT. Lala Sakechep leh a thawhpuiten mamawh an neih hrang hrangte a hnenah an lo thlen a; Court Building sakna tura ruahman hmunhma an thlirho bawk a. Minister chuan CJM leh a thawhpui ten a hnena an thil thlen te chu a theih anga lo bawhzui a tum tih sawiin, tuna DC Office Building pakhat an luah chu Building hran an neih thuai a tul thu a sawi bawk. Minister hian nimin tlai khan Lawngtlai chhuahsanin Tuipang a pan a; COVID-19 do-a ramria hma lak dan te a hmunah enin ramria duty te a tlawh ang.