Inbuatsaihna peihfel a ni

Mizoram pawn-a Mizo tangkhang hruaihaw mekah nizan khan State pathum atangin mi tha-hnem tak chuan Mizoram rawn thleng tura beisei niin Serchhip District-a haw tur mi 92 te lo dawngsawng turin Serchhip District-ah pawh inbuatsaihna peihfel a ni.
Rampum-a inkhar-khipna kalpui a nih avanga Mizoram mi leh sa tangkhang hruai haw mekah hian nimin khan Gujarat, Madhya Pradesh leh Karnataka-a tangkhang mi 2000 chuang te chuan Mizoram an rawn thleng tura beisei an ni a, amaherawh chu tunhnaia ruahsur avanga leimin a awm zeuh zeuh avangin Rel rawn thlen hun tur hi chiang taka hriat theih a ni lova, harsatna dang a awm loh chuan Rel rawn thleng hmasa tur zawk hian nizan dar 7:00 velah Bairabi hi rawn thleng tura beisei a ni a, heng mite lo dawngsawng tur hian inbuatsaihna engkim peihfel a ni tawh a ni.
Heng State pathum atanga rawn haw te hi Bairabi an rawn thlen hnuah Screening te nei-a enfiah an nih hnuah Bus hmangin anmahni District theuh panpui nghal an ni anga, Serchhip-a anmahni dahna tur hmun ah te hian Medical Team in an dinhmun an lo enfiah leh vek dawn a ni.
Ruahman lawk ang chuan Karnataka atanga Serchhip District-a rawn haw te hi Marian High School-ah dah an ni anga, Mipa 21 leh hmeichhia 31, an vaiin mi 52 niin Room hrang-ah dahin Gujarat leh Madhya Pradesh atanga rawn haw tur hmeichhia mi 37 te chu Govt. Serchhip College-ah dah an ni anga, mipa 3 te erawh chu Khawtetlang-a Tourist Lodge-ah dah an ni dawn thung a ni.
Tun tuma rawn haw tur zinga Community Facility Centre-a dah turte hi an mamawh tur hrang hrang lo ngaihtuah sak niin mutbu erawh chu mahni intum tura ruahman a ni a. Heng hruaihaw te lo buaipuitute chuan ei leh in chungchang ah tun thlengin harsatna ala awmloh thu sawiin, tuna hruaihaw turte ei leh in pe tur hian ruahmanna pawh engkim peihfel a nih thu an sawi bawk.

Comments

Chhiar Hlawhte