Malaria laka mipuite an him theihna turin Serchhip District-ah Thosilen sem mek a ni

Malaria laka mipuite an him theihna tura Health Department hmalakna kal zelah tunlai hian Serchhip District chhunga khaw hrang hrangah Thosilen semchhuah mek niin Thosilen sem lohna khua ah te pawh damdawi hmanga Thosilen chiah hna thawh mek a ni.

Mizoram-ah Malaria hluar lai a thlen chhoh leh tan avangin Malaria laka mipuite an him theih nan Serchhip-a Health Department chuan tunlai hian nasa takin tan an la mek a, tunkar Nilaini atang khan Serchhip District chhung khaw hrang hrangah Thosilen hi semchhuah tan niin kumin hian District pum-a khaw 24-ah Thosilen hi semchhuah tura ruahman a ni a, a bultanna atan Thenzawl CHC hnuaia khaw hrang hrangah sem hmasak niin Thenzawl, Buangpui, Neihloh leh Kanghmun khua ah te Thosilen hi sem niin Ningani khan Chhingchhip PHC hnuaia Hmuntha leh Thentlang Sub-Centre huamchhungah Thosilen sem hna hi thawh tan niin nimin khan North Vanlaiphai PHC huamchhung ami te hnenah semchhuah tan ve leh a ni bawk.

Kumin hian Thosilen sem tur hian Size chi thum (3) rawn thleng tura beisei niin a te ber-ah 5778, a laihawl-ah 3850 leh a lian ber 3631, a vaiin 13,259 sem tura ruahman a ni a, Thosilen semna tur khua hi kum 5 kalta chhunga Malaria vei awm dan atanga teh niin mi 1000 zel-a mi 2 aia tam Malaria vei awmna khua ah te sem tur a ni a, Thosilen semna khua ah te hi chuan a zar duh turte chuan an dawng thei vek a ni.

Hetihlai hian Thosilen sem lohna khua ah te pawh damdawi hmanga Thosilen chiah hna chu tunlai hian ngawrh taka kalpui chhunzawm mek a ni bawk a, In lama damdawi hmanga Thosilen chiah a nih bakah hian ramriak mi te chu an Lo leh leilet-ah te kalchilhin damdawi hmangin Thosilen hi chiah sak an ni a, hei bakah hian ram-riak ngawrh zual te chu an thisen te enfiah sakin Malaria hrik an pai leh pai loh te pawh enfiah sak nghal zel an ni bawk. Damdawi hmanga Thosilen chiah mekah hian Thosilen semna khaw thenkhat ah te pawh Thosilen chiahna hun hi buatsaih a ni bawk.

District Vector Borne Disease Control Programme hnuaiah hian COVID-19 avanga ramri-a VLTF Duty mek te chu Thosilen pek an nih bakah an Thosilen te damdawi hmanga chiah a ni tawh bawk a, hei bakah hian an hriselna dinhmun te pawh enfiah sakin an riahna te DDT hmanga kah a ni tawh bawk a ni.