Chanchin thar thenkhat :

CM hovin thutkhawm nei

Nimin khan Chief Minister, Zoramthanga hovin AH&Vety Minister, Dr. K. Beichhua leh Veterinary, Fishery and Sericulture Board Vice Chairman, C. Lalmuanpuia bakah AH&Vety Department hotute chu thukhawmin Novel Coronavirus hrileng avanga inkharkhipna kalpui mekah ei leh in lama harsatna mipuiin an tawh loh nana an Department hmalakna leh project dang hrang hrang hrangte an sawiho a. He sawihona CM Office Cabinet Meeting Room-a neih ah hian Chief Minister chuan hmasawnna tluantling nei tur chuan ei tura intodelh a pawimawh thu leh, tun hun khirh kan hmachhawn hian hei hi a tihchian lehzual thu a sawi a. Agriculture leh Horticulture department lamin buh, thei leh thlai lama into-delhna tura hma la in, Vety Department chuan Sa, Artui leh Bawnghnute a intodelh a hnianghnar zawka kan inchawm theih dan tur te, hemi atana kuthnatawktute puih dan tur te ngaihtuah a ngawrh taka hma la chhunzawm zel turin a chah bawk.

YLA in Total Lockdown puang

Hri leng avanga fimkhur thilah Central YLA chuan nimin tlai dar 6:00 atanga karleh Thawh-tanni zing dar 6:00 thleng Lawngtlai District chhungah Total Lockdown a puang. Central YLA thuchhuaha tarlan danin, State pawn atanga Lawngtlai District mi rawn haw an awm deuh reng avangin fimkhur thil ah Total Lockdown hi puan a ni a, Total Lockdown neih chhung hian mipui pawn lama chhuah hrim hrim, Dawr hawn leh lirthei chet vêl zawng zawng khap tlat a ni. Lawngtlai khawpui chhung bikah District pawn lam atanga lirthei tlanluh leh chhuah khap a ni a. Hei hian Siaha-a tlang nghal tur lirthei, Essential Commodities phur lirthei, Sawrkar Official, tul bik thila chhuak/lut turte bakah State pawn atanga zirlai/hnathawk lo haw mekte chu a huam dawn lo a ni. Central YLA chuan tuna Lawngtlai District mi khunghran mek te chu ni 14 hnua an chhuah hunah zalen nghal mai lovin, mahni In lamah ni 14 dang in khunghrang leh rih turin an ngen bawk.

Mi 273 sample enfiah tawh

Nimin thleng khan Mizoram-ah COVID-19 avangin mi 273 te Sample enfiah ni tawhin he hri kai hmuhchhuah belh an la awmlo zel a, nimin tlai thleng khan COVID-19 kai rin-hlelh damdawi In a enkawl mi 53 awmin sawrkar hmun siam-a inkhunghrang mi 2350 leh mahni In lama inkhunghrang mi 7208 an awm bawk a. Hei bakah hian mi 3015 te chu Rapid Anti Body Test of India (RATI) neih a ni tawh bawk.

Sum thawh tur tipung dawn

MNF Legislature Party Secretary, L. Thang-mawia MLA chuan nimin khan thuthar thehdarhtute kawmin COVID-19 dona atana Chief Minister, Speaker leh Minister ten an hlawh atanga an thawh tura an lo ruahman tawh chu ti danglamin, Chief Minister chuan a hlawh atanga zaa-a 60 a pe dawn tih sawiin, Speaker, Minister leh Govt. Dy. Chief Whip te chuan an hlawh atanga za-a 50 an pe dawn tih a puang.

Admission tih rihloh tur

Mizoram sawrkar-a School Education Department chuan COVID-19 leng mek avangin sawrkar leh Private Higher Secondary School zawng zawng ten pawl 11 Admission la tih rihloh tur a nih thu thuchhuah siamin a tarlang a, Admission tih theih hun tur chu in hriattir leh a nih tur thu an tarlang bawk. Hei bakah hian Sawrkar School, a bikin Primary School leh Middle School-ah Admission te hi tihfel vek tawh tura ngaih a ni tih pawh tarlangin, Chhungkaw ro-khawlhna avanga a hunlaia tifel hman lo awm theih a nih avangin, naupangten harsatna an neih loh nan Enrolment tihsak ngai an awm zauh anih chuan VLTF te rawn chunga lo enfel turin Zirtirtute chu hriattir an ni bawk.

OST lakna tur hawng thar

Social Welfare Minister Dr. K. Beichhua chuan nimin khan Chawlhhmun-a Agape Moral Reformation Organisation (AMRO) hmunpuiah COVID-19 hrileng avanga inkharkhip chhunga damdawi hmanga ruihhlo ngaite enkawlna, Opioid Substitution Therapy (OST) lakna tur a hawng a. He hunah hian SWD Minister chuan natna hri leng avangin khawvelin harsatna hrang hrang a tawk mek tih sawiin, chutihlai chuan sawrkarin ruihhlo ngaite harsatna a hriatpui thu a sawi a. Ruih-hlo ngaite engtin nge chhanchhuah an nih ang tih ngaihdan atangin he hmalakna hi lo chhuak tih sawiin, hrileng avanga khawvel kalphung pangngaia kal thei tawhlo karah ruihhlo nghei tumna tak tak nen ruihhlo ngaite chu inbuatsaiha, sawrkar hmalakna tha taka thawhpui turin a ngen bawk.

Crisis Management System din

State Disaster Management Authority hnuaia State Executive Committee chuan COVID-19 hripui leng dona kawnga Sawrkar in a din, State Level Task Force, Task Group hrang hrang leh Committee peng dangte thawhona a chak zawk nan a pumpuia hengte khaikhawmtu tur COVID-19 Crisis Management System chu Chief Secretary kaihhruaina hnuaiah din thar a ni.