Phai Sangha man a sang

Rampum-a inkharkhip kalpui a nih hnuah Serchhip Bazar-a Sa man a danglam lutuk loh laiin Phai atanga lakluh Sangha man erawh nasa takin a pung thung.
Nimin khan kan Palai chuan Serchhip Bazar hi tlawhin inkharkhip kalpui a nih tak avanga Sa man danglam dan a zirchiang a, Serchhip Bazar-a vawksa zuar thintute chuan tunhma deuha sawrkar phalna anga rampawn atanga Vawk hrisel ngei tih hriat leh lakluh, Aizawl atanga an lakchhawn ve leh thin chu Vawk lak-luh khap a nih tak avang leh Serchhip District pawnlam atanga Vawk lakluh khap a nih bawk si avangin an mamawh khawp Vawk talh tur a awmloh thu an sawi a, tunah hian Serchhip District chhung khaw hrang hrang ami Vawk laluta an talh thin thu sawiin, Kg. khat man erawh danglam lovin Kg. ah Rs. 350/- ala nih thu an sawi a. Serchhip-a Bazar hun siam, Nilaini leh Inrinni-ah chuan Vawk talh tur an la neih theih thu leh bazar ni lo-ah hi chuan talh dawn pawh nise talh tur an hmuh mumal tawhloh thu an sawi a. Vawksa rep zuartute pawhin Vawksa rep hi a man ala danglam loh thu sawiin, Tul khat an siam chu Rs. 350/- zela an la zawrhchhuah thu an sawi bawk.
Arsa zuartute pawhin Ar talh tur a vang tial tial tih sawiin, Ar puah sa an hralhna man erawh la danglam lovin tunah hian Kg. khat Rs. 280/- zela an la hralh thu an sawi a, Serchhip khawchhung ah chuan Ar puitling talh tur lei tur a awm tawh meuhloh thu an sawi bawk. Bawng talh tur a awm meuh tawhlo nia thudawn a ni bawk a, khawchhak lam atanga Bawng rawn kai an awm ngai tawh meuhloh avangin Bawng pum lei tur a vang hle nia sawi a ni.
Hetihlai hian Phailam atanga lakluh Sangha man erawh nasa takin a pung thung a, inkharkhip hmaa Phai Sangha kg. ah Rs. 250/- a zawrh thin chu tunah hian kg. ah Rs. 400/- a ni tawh a, a hma aia a man sanna hi Kg. ah Rs. 150/- zet niin hei pawh hi lak tur an hmu mumal tawhlo tih Sangha zuartute chuan an sawi bawk.

Comments

Chhiar Hlawhte