Tun thla ni 31 thleng Serchhip District-ah Lockdown kalpui a nih tur thu puang

Serchhip District Bawrhsap leh District Disaster Management Authority-a Chairman, Dr. Lalzirmawia Chhangte chuan May 17, 2020 atanga May 31, 2020 thleng Serchhip District-ah Lockdown kalpui chhunzawm tur a nih thu a puang.
Nimin a thupek a tihchhuah ah Serchhip District Bawrhsap leh Serchhip District Disaster Management Authority-a Chairman, Dr. Lalzirmawia Chhangte chuan Mizoram Sawrkar-in COVID-19 darh zel tur venna atana Lockdown kalpui chhunzawmna tur Order tun thla ni 17-a a tihchhuah zulzuiin Disaster Management Act, 2005 Section 26-in thuneihna a pek angin Serchhip District-ah ni 17.05.2020 atanga Dt. 31.05.2020 thleng Lockdown hi kalpui chhunzawm tur a ni tih a puang a. He inkharkhip (lockdown) Serchhip District-a kalpui chhunzawm zel dan tur leh hriattur pawimawh hrang hrang duan/siamte pawh tarchhuak nghalin, mi zawng zawngte zawm vek tura hriattir an nih thu a tarlang a. Hei hian Lockdown kalpui dan tur chungchanga order tihchhuah tawh zawng zawng a luahlan (supercede) thu pawh a tarlang a. Hei bakah hian zan lam dar 7:00 atanga zing dar 4:00 thleng pawnchhuah khapna leh vantlang hmun leh hnathawhna hmun a vawi khat a mi panga (5) aia tam punkhawm khapna Order, District Magistrate in a tihchhuah pawh ala ding reng tih a tarlang tel nghal bawk.
Nimin a Serchhip District Bawrhsap thuchhuah siam hian tun thla ni 31 thlenga Lockdown kalpui dan tura Mizoram sawrkar in ruahmanna a siam te pawh a tarlang nghal a. Passenger phurtu lirthei ten an zawm turte pawh tarlangin, heng lirthei hrang hrangah hian Registration Certificate-a tarlan Seating capacity bak passenger phurh phal a ni lo tih a tarlang a. Driver/Conductor leh Passenger-ten zin kawngah Mask an vuah ngei tur a nih thu te, Driver-in a zing thei ang berin motor chhung leh vawnban te uluk takin a ti thianghlim thin tur a nih thu te, Sanitizer hman tur motor ah a awm ngei tur a ni thu te a tarlang a. Bazar leh sumdawnna hmuna zawm tur zingah Bazar, dawr leh hmundanga kal tur reng reng chuan (face mask emaw hmanraw dang hmangin) hmai an tuam ngei ngei tur a nih thu leh mi 3 aia tamin dawr pakhat an nghak tur a nih loh thu bakah Dawr nghaktu ten Face Mask an hmang reng tur a ni tih te pawh tarlan a ni.

Comments

Chhiar Hlawhte