Airport Cute ber siam tumin CM a phar buai - MPYCC

Congress Thalai, Mizoram Pradesh Youth Congress Committee (MPYCC) chuan Airport Cute ber siam tumin Chief Minister a phar buai hle niin an sawi.
Nimin a thuchhuah an siamah MPYCC chuan Mizoram mipuite COVID-19 do a kan phek buai laiin Chief Minister, Zoramthanga chuan khawvel-a Airport cute ber siam tumin theihtawp a chhuak mek nia tarlangin, “Ni 58 zet Mizoram mipui kan in lockdown chhungin Chief Minister hian Lengpui Airport siamthat mek chu mipui hriatah vawi 3 ngawt a tlawh tawh a ni,” an ti a. Lockdown chhung, thlawhna service theihloh lai chuhin Lengpui Airport runway siamthat hna hi ngawrh taka thawh a nih thu leh he hnathawh hi mipui hriatah vawi thum - April 29, May 9 leh May 18 khan Chief Minister hian a tlawh nia sawiin, hetihlai hian ramri-a VLTF te, Volunteer duty-te, Police duty te emaw, damdawi lama thawkte emaw ngaihvenin vawi khat mah a la zinchhuak lo nia an sawi bakah COVID-19 veite enkawlna tur bika ruat Falkawn Referral Hospital takngial pawh a la tlawh lo niin an sawi bawk.
MPYCC chuan Finance changtu Chief Minister, Zoramthanga hian Mizoram sawrkar sum dinhmun hre lo mah se, hetiang taka a ngaihpawimawh Lengpui Airport runway siamna senso tal hi chu a hre turah an ngai tih pawh sawiin, “Hetia Lengpui Airport a tlawh fo hian Lengpui bul lawka awm Lengte-a Mau hardening-na hmunpui, ZPM Secretary General Pu K. Sapdanga ho a an lo zu tlawhchhuah tawh pawhin nasa taka hma a sawn phah kan beisei takzet a ni,” an ti bawk.

Comments

Chhiar Hlawhte