Chanchin thar thenkhat :

Aizawl Civil Hospital tlawh

Health and Family Welfare Board-a Vice Chairman leh COVID-19 Medical Operational Board Chairman, Dr. ZR. Thiamsanga MLA chuan nimin khan Civil Hospital Aizawl tlawhin COVID-19 hri leng laka inven dan turte a sawipui bakah OPD tawt lutuk tih ziaawm nan Medicine bik OPD Dawrpui Multipurpose Centre a sawn lailawk pawh a hmunah a en nghal a. Hma-lakna kal mek bakah thil tul leh tih belh ngai awm deuh te Civil Hospital thuneitute nen an sawiho nghal bawk. Dr. ZR Thiamsanga chuan, Dawrpui Multipurpose Centre thuneituten mipui leh Civil Hospital a thawktute himna tur ngaihtuaha an hmunhma te phal taka a thlawn a an hman tir thei chu lawmawm a tih thu sawiin, thinlung takin Health Department leh mipui aiawhin lawmthu a sawi bawk a ni.

Lengpui Airport enfiah
Sawrkar laipui ruahmanna anga karleh, May ni 26 atanga Thlawhna (Air India) thlawhtir tan a nih dawn avangin hripui laka Mizoram a him zel theihna atan Directorate of Health & Family Welfare te chuan ruahmanna fel tak siam turin nimin khan Lengpui Airport-ah mithiam te tirin, thlawhna a chuangte dawnsawn dan tur ruahmanna felfai thei ang berin an duang a. Heng an rua-hmanna te hi Office lamah ennawn leh turin an dah a ni. Health Department hotute hian Lengpui thlawhna tumhmunah hripui laka invenna atana hmanraw mamawh chi hrang hrang bâwm (consignment box) 101 rawn thleng thar an lo dawng-sawng nghal a. Heng hmanraw rawn thleng zingah hian mihring thawk pekna (Ventilators) 5, Personal Protective Equipment 2000, Hri enna (PCL Rapid Test Kits) 13000, N 95 hmai tuamna (Mask) 5000 leh hmanraw dang tam tak a tel a ni.

Mi 324 te Sample la tawh
Nimin thleng khan Mizoram-ah COVID-19 avangin mi 324 te Swab Sample enfiah tura lak ni tawhin COVID-19 kai hmuhchhuah belh erawh an la awm lo thung.

Inhrilhhriatna hun buatsaih
Nimin khan Champhai-ah Community Quarantine Centre tura ruat Kohhran Hall hrang hrang hman dan tur chungchang inhrilhhriatna neih a ni a, tunah hian Champhai panin ramchhunga tang-khang thahnem tak haw mekin heng mite hi Medical Screening leh Rapid Test te neih a nih hnuah heng Quarantine Centre-ah hian dahluh an ni dawn a ni. Champhai khawpui leh a chhehvela Kohhran 18 te chuan Community Quarantine Centre tura an inhuam thu an thlen tawh a. Heng zinga Kohhran 6 te chuan ei leh in an tum sak thei dawn a ni.

Naktuk-ah rawn thlen beisei
Rampum-a inkharkhip kalpui a nih avanga tangkhang ten Mizoram rawn pan zelin nizan hmasa khan Hyderabad atangin mi 600 chuang te chuan Rel hmangin Mizoram an rawn pan a, ruahman lawk ang chuan heng mite hian naktuk, Pathianni hian Bairabi Rel Station an rawn thleng anga, a hmalama lo kalpui tawh angin an hriselna dinhmun te enfiah sak an nih hnuah mahni District theuh panpui an ni ang. Tun tuma rawn haw te hi an haw-na man zawng zawng tum sak vek an ni.

Security Deposit atangin kawng siam hna thawk
Kolasib District chhung Bairabi road-a Meidum leh Zero point inkar, G.P Project Ltd. te siam chu a siamthat hna thawk tura tum 5 lai hriattir an nih hunah siamthat a nih loh avangin an Security deposit sum atangin a siamthat hna PWD ten an thawk. PWD Highway Division-V, Thingdawl-a Sr. EE, Lalthanzuala chuan G.P Project Ltd. ten kawng an siam hi kum thum chhung a chhia thawmthat hna an thawk tur a ni a. A chhe lai te thawmtha tura nikum November thla atanga hriattir tawh an ni chungin, tun thlenga an la siam that loh avangin an Security deposit cheng nuai 65 an dah hmangin PWD ten a thawmthat hna an thawk dawn a ni.

COVID-19 kai hmuhchhuah an pun belh zel
India ramah COVID-19 kai hmuhchhuah mi 1,18,447 tling tawhin nunna chan mi 3583 an awm tawh. Ministry of Health & Family Welfare chhinchhiah danin India ramah COVID-19 kai hmuhchhuah hi an la pung zel a, nimin thleng khan he hri kai hmuhchhuah hi mi 1,18,447 tling tawhin enkawl dam mi 48,533 an tling tawh a, hei hi hri kai hmuh-chhuah atangin zaa 40.97 an tling tawh a ni. Hetihlai hian he natna kai zingah nunna mi 3583 awm tawhin hei hi hri kai hmuhchhuah atangin mi 3.02 an ni a, tunah hian he hri kai enkawl mek mi 66,330 an awm bawk a ni.

Comments

Chhiar Hlawhte