Agriculture leh Irrigation Deptt. hmalakna tur sawiho

Nimin khan Chief Minister, Zoramthanga hovin CM Cabinet Meeting Room-ah COVID-19 hrileng avanga loneitute harsatna tawh sukiang tura hmalakna te leh buh-a Mizoram a intodelh theihna tura hmalakna thar ruahmanna te chu Agriculture leh Irrigation & Water Resources Department Minister, C. Lalrinsanga leh Officer te nen sawiho a ni.
He sawihona hunah hian Chief Minister chuan ei tur-a intodelh chu sawrkarin a ngaihpawimawh tih sawiin, flagship programme SEDP pawhin a tum pui ber zing a mi a nih thu leh, intodelh pawimawhzia chu tun COVID-19 hrileng hian a tihchian zual thu a sawi a. Tun dinhmunah Agriculture, Horticulture, Vety, etc. ah te chuan hmalakna thar siam belh kan mamawh a nih thu a sawi a. Ei leh in lama kan intodelh a, kan kuthnathawktute sum lakluh a pun theihna turin leh hnamdang-a innghat lova theihtawp chhuahin tun hun hi kan hman tangkai a tul thu a sawi bawk.
He hunah hian tunlai Novel Coronavirus hrileng avangin hmun thenkhata leilet a thawktu hnamdangte an haw avang leh lei lehna tur Bawng a awmloh avanga leilet tawl mai tur khawl hmanga hna tul thawh a nih thuai theih nana Agriculture Department hmalak dan turte sawiho a ni a. Heng bakah hian hmun dang danga hlawk zawk leh mihring tha seng tlem zawka buh thar tura ruahmanna siam awm leh project siam te thlirho a ni bawk.

Comments

Chhiar Hlawhte