Airport hawng tan dawn

Vawiin May ni 25, 2020 atang khian ram chhungah thlawhtheihna thlawh tantir leh tum a ni.
Airport Authority of India-a Chairman Arvind Singh-a’n AIR News a hrilh danin ram chhunga tumhmunte chu Thlawhna thawhtir tur hian an inbuatsaih fel vek tawh a. Thlawhnaa chuangte in-tawk lo tur leh inchiahpiah lo tura ruahmanna siam vek a nih thu a sawi bawk. Ram chhunga thlawhna thlawk hi COVID-19 inkharkhipna vangin March ni 25 atang khan tihtawp vek a ni a. Thla 2 hnuah thlawhtir chhunzawm leh a ni dawn ta a ni.
Lengpui Airport-ah pawh naktuk atang Thlawhna thlawh tir a ni dawn Civil Aviation-a Principal Consultant, Wing Commander J. Lal-hmingliana chuan a sawi a, Air India thlawhna Airbus 319 chu Lengpui-Kolkata-Imphal inkarah a thlawk leh tan dawn a. Lengpui tumhmun ah hian nidang anga Inner Line Permit (ILP) pek chhuahna hawn a ni dawn lova, Mizoram Home Department-in a bik taka phalna a pek ni lo, Mizoram pawn mi Lengpui a lo tum an awm a nih chuan a chuanna thlawhna vekah thawn kir leh a ni ang. Air India thlawhna hi Thawhlehni, Nilaini leh Ningani-ah te a thlawk thin anga, Pathianni-ah sipaite pual bika thlawk a awm bawk anga. June ni 30 thleng atan thlawhna thlawh hun hi ruahman chhin a ni. Inkharkhip hma a thlawk thin GoAir thlawhna erawh chu September thla hma hi chuan Lengpui-ah a thlawk rih dawn lova, boruak awmdan a zirin IndiGo pawh lo la lut tura ngaih a nih thu Principal Consultant chuan a sawi.
Lengpui tumhmun lo thleng thar apiang chu COVID-19 vei anga an awm leh awm loh endik leh Rapid Antibody Test (RAT) emaw, State Sawrkarin a bituk ang zela endik thin an ni ang. Sawrkar laipuiin Red Zone-a a puan atanga lo thlengte chu Lengpui tumhmuna RAT bakah an inkhunghranna (quarantine) hmun an thlen hunah RT-PCR test tih leh vek tur a ni.

Comments

Chhiar Hlawhte