Mizoram-a tangkhang ten Larsap puihna an ngen

Rampum-a inkharkhip kalpui a nih tak avanga rampawn lam mi, Mizoram-a tangkhang Zirtirtu leh zirlai mi 8 te chuan nimin khan Mizoram Larsap hmuin hma lak sak turin an ngen.

Nimin a Governor hmutute hi Arunachal Pradesh, Uttar Pradesh, Haryana, Rajasthan leh Kerala-a haw turte niin an hawna tur Thlawhna cancelled leh postpone te a ni a. Mizoram Governor, P.S. Sreedharan Pillai chuan Mizoram a tangkhang mek State pawn lama haw turte chu a tul anga hma a lak sak tur thu lo hrilhin, Airport thenkhat te an la inhawn fel theih loh avanga ni reilote chhung chu nghah rih pawh a tul a rin thu a sawi a. COVID-19 hripui leng avangin mi te ber atanga mi lian ber pawhin harsatna kan tawh vek thu leh he harsatna hi kan zavaia tangtlanga paltlang kan tum a ngaih thu a sawi bawk. Governor chuan Mizoram Raj Bhavan chu hmundanga mi te ang lovin, Raj Bhavan thar, a mamawhtu apiang milian leh te ber tan pawh a inhawng a ni tih sawiin, Mizoram atanga hmundang pan duh tanpui ngai emaw, pawn lam atanga Mizoram-a rawn haw duhte tan pawh Raj Bhavan, Mizoram chu Phone hmanga biak theih reng a nih th a sawi bawk.

Nimin a Mizoram Governor hmutu zinga thenkhat pawisa nei tlem tawh, Hotel-a thlenna tur atana senso nei tawh lo mi pali (4) te chu Governor hian Raj Bhavan-ah niminpiah lam atang khan a lo mikhual tawh a, COVID-19 hrileng avanga la haw thei lo, IIMC Hostel, Ramrikawn-a awm mek zirlai tangkhangte tan Governor ruahmanna in Raj Bhavan Staff te chuan karkhat chhung chaw an pe tawh bawk a ni.