MZP in lawmman sem

MZP buatsaih Lockdown denchhena Article Inziahsiak result puanna leh lawmman semna chu nimin khan Aizawl-ah neih a ni a, he hun hi Mizoram Youth Commission Chairman, Dr. Vanlaltanpuia chuan khuallian niin a hmanpui a ni.

MZP Coference Hall, Treasury Square Aizawl-a he hun hmanna ah hian MYC Chairman chuan MZP in zirlaite tana inelna thianghlim tak mai a buatsaih chu tha a tih thu leh MZP nawrna avangin thalaite kawng dik kawhhmuh turin Mizoram Youth Commission chu 2008-ah din niin, India ram State tam tak zinga a awmchhun tlemte zinga mi a nih thu a sawi a. MYC chu Mizo thalaite tan chak taka kal turin a inpuahchah mek tih sawiin, thalai Coaching kal dan turte leh IAS tling ngei turin hma an lak mek thu a sawi a. “Kan ramah Zonun zemawi kalpui thar deuh deuh a tul a, corruption laka fihlim leh ram hmangaihtu tak tak kan mamawh a, chutiang mi chherchhuah kawngah chuan MYC in theihtawpin hma a la zel dawn a ni,” a ti bawk.

MZP hian Lockdown denchhena Article inziahsiakna hi District hrang hrangah buatsaihin Category 3-ah then niin Primary atanga Higher Secondary School thleng inelna chu mahni District-ah theuh neih niin College zirlaite puala inelna chu Mizoram pum huapa neih a ni thung a. ‘Inkharkhipin a tha zawnga Zofate a nghawng dan’ tih thupui hmanga College zirlaite inelna ah hian KC. Chawngthan-khuma, IV Semester LLB, Govt. Mizoram Law College chu pakhatna niin R. Lalduhawma, IV Semester, B.ED, IASE, Aizawl chu pahnihna niin Rinnghakmawia, VI Semester, BA, Govt. J. Buana College, Lunglei chu pathumna a ni bawk.

He hunah hian MZP General Hqrs. Pre-sident, B. Vanlaltana chuan inkharkhip chhunga zirlaite thluak sawizawina a nih beiseia he inelna hi buatsaih a nih thu a sawi bawk.