Chief Minister in Kolasib District-a ramri ven hna thawktute an duty-na ah a tlawh

Chief Minister, Zoramthanga chuan nimin khan Bairabi, Zophai, Phaisen leh Vairengte a Mizoram leh Assam inrinaa COVID-19 duty te chu an duty-na hmunah tlawhin, ramri ven hna thawktute a kawm a, State pum him theihna tura theihtawp chhuah a ramri-a duty-te chungah lawmthu a sawi bawk.

Nimin-a Kolasib District chhung heng khaw hrang hrang a tlawhna ah hian Chief Minister, Zoramthanga chuan tunhnaia State pawn atanga Zoram mi leh sa tangkhang lo hawte avangin Bairabi khua chu an hah phah hle tih sawiin, Vairengte pawh bungraw chawkluhna luhka ber a nih avanga duty te an hah hle tih a hriatpui thu sawiin, an inpekna chu fakawm a tih thu a sawi a. Volunteer duty-te chu ramdang tan pawha entawntlak, sawrkar laipui-a hotute lakah pawh a zuk chhuan pui thin an nih thu sawiin, khawtlang mipuiten mamawh an neih hrang hrang te chu hriatpuiin, a remchan dan ang zela umzui sak an nih tur thu Chief Minister chuan a sawi bawk.
Chief Minister hian Bairabi khaw luhna Lei (bridge) siam that mek chu enfiahin, Bairabi By-pass Road (Bairabi khua hel-a Rail Station panna kawng) a enfiah bawk a. Helai By-pass Road hi kum 1998-a siam niin, FCI Godown atanga buhfai leh thildangte phurhchhuahna atana hman thin a ni a. NH-154 siam zawh hnuah kawng thar hman a nih zawk tak avangin he kawng hi hluihlawn a ni ta a. Tunlai-a COVID-19 hrileng avang hian mihring leh bungraw phur motor-ten khawchhung lut lova an kal theihna remchang atan ruahmanna siam tharin, a chhe zual lai te hnawh a hman a ni leh tawh a ni.
Chief Minister hian Bairabi Rel chawlhmun pawh tlawhin duty-te a kawm bawk a. Chief Minister hian Bairabi khawtlang hruaituten Tlawng lui kam-a leimin thin venna tura lungrem siam an dil chu a hmunah a enpui a. Zophai leh Vairengte ramri-a leilet hmuna hmalak dan te thlir bawkin, khawl hmanga tha tlem zawk leh hlawk zawka buh thar theih dan turte an sawiho bawk.
Chief Minister hian Vairengte Check Gate-a Screening Point enfiahin, duty te nen an inkawm a. Thermal Scanner thar, Khawsik leh siklo enfiahna chu a en bakah Bungraw phur Motor State chhunga lo lut an kahfai (sanitize)-te enin, 1st IR Battalion Camp a tlawh bawk a. Chief Minister hian COVID-19 avanga boral, H. Rohmingliana, Vairengte chu a ral bawkin, Vai-rengte Block MHIP te enkawl Hope Centre (Beiseina In) a tlawh bawk.
Chief Minister hian Kolasib Circuit House-ah Kolasib DC leh khawtlang hruaitute pawh inkawmna hun neih puiin mipui mamawh bungrua kan phurhluhna kawng chu kawng chhia vanga harsatna lian kan tawh loh nan tun Fur pui rawn thlen hma hian a chhe zual lai siam that ngai te chu a remchan dan anga hmalak nghal thuai a pawimawh thu a sawi bawk.
Nimin a heng hmun hrang hrang tlawhtu Chief Minister hian Bairabi Joint VC hnenah puihna sumfai Rs. 20,000/- leh silpauline 6 pein, Vairengte Joint VC hnenah Rs. 40,000/- leh silpauline 8 a pe a. Hand sanitizer litre 20, Face Mask 100 leh Gloves pair 100 a pe ve ve bawk a. Zophai leh Phaisen Police Outpost-a Police duty te hnenah Rs. 10,000/- ve ve leh silpauline a pe bawk.
Kolasib District chhung hmun hrang hrang tlawhtu Chief Minister hi FCS&CA Minister, K. Lalrinliana leh Rubber & Allied Crops Development Board Vice Chairman, Lalrins-anga Ralte bakah Kolasib District DC, SP leh District Official dangte leh Aizawl atangin PWD leh H&FW Department hotuten an tawiawm a, National Highway leh kawng dang siamthat ngai an enfiah nghal bawk a ni.

Comments

Chhiar Hlawhte