Chanchin thar thenkhat :

Minister in Chawngte tlawh

Agriculture Minister, C. Lalrinsanga chuan nimin khan Chawngte tlawhin Chakma Autonomous District Council (CADC) member-te a kawm bakah, COVID-19 laka mipui an him nana thawktu Border Area-a VLTF te a tlawh bawk. Nimin a CADC hotute nen an inkawmna ah hian lock-down vanga harsatna hrang hrang awm thei sawrkar in a ngaihven reng tih sawiin, chutiang harsatna te chu a hmuna zirchiang tura thawk chhuak an nih thu a sawi a. COVID-19 boruakah thildang zawng aiin ei leh bar tur kan mamawh ber avangin harsatna lo thleng thei laka lo inralrin a, intodelh tura hmalak a pawimawh thu a sawi bawk. Minister hian Chawngte area chu intodelhpui thama buh leh thlai thar chhuak thei turin hmun tha leh awhawm tak a nih thu pawh sawiin, CADC-a CEM kutah hnim kahna hlo leh khawl bakah thlai chi te a sem nghal bawk.

Bus chesual-ah 1 hliam

Inkharkhip kalpui mek avanga Mizoram mi tangkhang te Delhi atanga Siaha-a dah tura rawn kal Bus pakhat chu nimin zing dar 5:00 vel khan Tawipui 'S' khaw dai-ah chesualin kawng-thlang-ah a tlanliam a, he Motor-ah hian Driver hnamdang mi 2 nen an vaiin mi 11 an chuang a, Bus-a chuang zinga pakhat, Beihniarili Syuhlo chuan a kawng-na tiin Lawngtlai damdawi In panpui a ni a, midang erawh Motor dang hmangin Siaha panpui nghal an ni. He Bus chetsual chhan hi chiang taka hriat ni lo mah se a khalhtu hi a muthlu nia rin a ni.

Aarogya Setu hman zel ngai

Mizoram Chief Secretary leh State Executive Committee-a Chairman, Lalnunmawia Chuaungo chuan thuchhuah siamin Mizoram-a bungraw thiar lut leh chhuak Drivers leh Handyman-te zinga COVID-19 vei ni a rinhleh te hriatchhuah a, chhui-chhuah zung zung an nih theih nan heng Driver leh Handyman te hian an Mobile Phone-ah Aarogya Setu application an install vek tur a ni tih a tarlang.

Insumkar rih turin ngen

ZPM |hlaite chuan COVID-19 avanga kan sawrkarin sum lama harsatna a tawh mek chhawk zangkhai tura MLA tam zawkin an hlawh atangin thla kua (9) chhung 30% leh an MLA Fund atanga nuai 50 an pek lai leh, Kohhran, Pawl leh mimal thahnemngai te'n CM Relief Fund-a sum an chhun-luh ruih ruih laia MNF Party worker te'n inthlahrunna neilo ang maia thil hmanhmawhthlak pawh nilovah contract an lo thawk mawlh mawlh mai chu pawi an tih thu thuchhuah siamin an tarlang a. Hri leng vanga hun khirh kan tawn mek lai hi chuan MNF Ministry chu mipui hmaizahna avang tal pawha lo insumkar hrih turin an ngen bawk.

MPC Thalai ten ZPM te chah

MPC Thalaite chuan ZPM Party chu Brig. T. Sailo hming ti bawrhbang tawh lo turin an chah tih thuchhuah siamin an tarlang a. Nimin a thuchhuah an siamah MPC Thalaite chuan ZPM Party in Brig. T. Sailo hminga MPC Party mite an party a huikhawm tuma an hmalak thinna leh mipuite bum nana, Brig. T. Sailo Policy an zuar chuan Party kawng bo, Policy nei mumal lova lalna leh thuneihna chauh atchilh an nih zia a tilang chiang hle ah an ngai tih an tarlang a. ZPM Party te hmalakna chu Zoram hmun hrang hranga MPC miten an pawmlo tih lo hre turin ZPM Party pawh an chah bawk.