Lengpui Airport-ah khawsik enna khawl bun a ni

Health Minister, Dr. R. Lalthangliana chuan Inrinni khan Lengpui Airport tlawhin Lengpui Airport-a khawsik enna changkang chi, 'Thermal & Optical Bi-Spectrum' dah tura bun mek chu a endik.
Health Minister hian India ramah Delhi, Bangalore leh Thiruvananthapuram Airport te dawtah hetiang khawl dah thei Airport palina kan ni hi thil ropui leh lawmawm tak a ni, a ti a. “Lockdown vangin hun rei tak Airport hi kan hmang tawh lo a, kan hmang leh tan dawn ta a, kan fimkhur hle a ngai a. Heng thil kan leina tur sum mamawhte phal taka min petu kan Chief Minister chungah pawh lawmthu ka sawi nghal a ni,” a ti.
Health Minister chuan he khawl bun thar hmang hian khualzin lo lut a piangte khawsik an neih leh neih loh awlsam tak leh rang takin an lo endik zel thei tawh dawn a, hemi hnuah hian Airport a endikna hmun dangah Rapid Antibody Test tih chhunzawm a ni ang a, rinhlelh an awm pawhin Sample lakna tur pawh Airport-ah vek hian peih fel vek a ni tawh a ni, a ti a. Lengpui tumhmun a Thermal & Optical Bi-Spectrum Camera aia te deuh leh ken awlsam zawk Handheld Thermal camera pawh Bairabi leh Vairengte-ah an dah thla bawk niin a sawi a ni.
Health Minister chuan COVID-19 vei ni a rinhlelhte RT-PCR hmanga Swab Sample Test zung zung a nih theih nan mithiamte nen inrawn tlan a nih hnuah ZMC-a COVID-19 Testing Laboratory chuan Pooled Sampling Technique a hmang tawh dawn tih sawiin, a bul tan nan tunkar atangin nitin Swab Sample 100 vel Test phawt tum a ni tih a sawi bawk.
Health Minister hian Lengpui PHC pawh tlawhin, Lengpui Airport leh Lengpui PHC-ah te hian Mask - 500 ve ve, Gloves - 500 ve ve, Hand Sanitizer Litres 20 ve ve, N95 Mask - 100 ve ve, PPE - 100 ve ve leh Rapid Test Kid -100 ve ve a pe nghal a ni.

Comments

Chhiar Hlawhte