Power Supply leh tui pump khawl vangin tui khaihlak

Serchhip Kawlri tlang, Eklavya Model Residential School (EMRS)-a Quarantine Facility Centre-a tui pump-na khawl chu a thar-a thlak a nih avang leh niminpiah-ah Power Supply a mumalloh avangin helai hmun-a awm te hian niminpiah khan Tui an dawng mumal thei lova, he harsatna hi sutkian a ni tawh.

Nizan hmasa lamah Social Media (Facebook) kal-tlangin Eklavya Model Residential School-a quarantine mek mi thenkhat chuan tui leh chaw an dawn chungchangah harsatna an neih thu tarlangin, hei hian sawi zui pawh a hlawh viau a ni.

Hemi chungchang hi kan palai chuan chhui zuiin PHE Department-a thawk te chuan helai hmun-ah hian Tui hi regular taka an pek reng thu leh Tuizem lian-ah tam tak a awm reng thu an sawi a. He School Tanky lian atanga tuizem te zawk-a tui pump chhawnna chu niminpiah-ah an thlak avanga an fit fuh theih mai loh bakah khawl hlui chu Marian H/S lamah hman tura an lak avang leh, nileng deuhthaw-a Power Supply a mumal loh avangin niminpiah tlai ah tui hi pump mumal theih a nih loh avangin harsatna hi an tawk tih an sawi a. Amaherawh chu a hma lamah leh hemi hnu hian harsatna a thlen zui loh thu an sawi bawk. Tui in tur pawh sawrkar in rua-hmanna a siam angin supply reng a nih thu leh harsatna a awmloh thu an sawi bawk.

Niminpiah tlai-a chaw an ei tlai chung-changah pawh hetianga Tui pump theih a nih loh avang hian eirawngbawltu an rawih chuan a hun taka ei hi a peih hman takloh thu leh ei tlai lutuk erawh an ni lo nia thudawn a ni a, helai hmuna eirawngbawl tur hian tlawmngai thei an inhmuh mai loh avangin tuna eirawngbawl tura an rawih hi tlawmngai tura rawih a ni a. Hetianga Social Media lama phunna a awm tak avang hian ani pawh hian a hna hi thawk chhunzawm lovin nimin zing-a tukthuan an ei tur pawh hmundang ami lak a tul ta nia thudawn a ni bawk.