MNYF in SEDP Board hnawk titu awm pawi an ti

MNF Thalai, Mizo National Youth Front (MNYF) chuan SEDP Board hrang hrangte hnawk titu an lo awm chu pawi an tih thu an sawi.

Nimin a thuchhuah an siamah MNYF chuan an Party in inthlan hmaa kan campaign au hlapui ber, Socio-Economic Development Policy (SEDP) chu MNF-in sawrkarna a siam phat ata tihhlawhtlin a nihna turin chak takin hma an la nghal tih sawiin, he policy tihlawhtling turin a Trade azira buaipuitu tur Board engemaw zat din nghal a nih thu leh heng Board-te hian hun reilote chhungin nasa taka hma lain an hmalakna te pawh engemaw chen chu chhawpchhuah a ni chho zel tih an sawi a.

Chief Minister in a lo sawi tawh angin heng Board hrang hrangte hian SEDP kalpuina turin Project an siam nghal thu leh heng project siamte hi a hmin hunah chuan SEDP hi nasa leh uar lehzuala kalpui theih a nih beisei a ni tih an thuchhuah ah chuan tarlangin, tunlaia khawvel tibuaitu, India ram leh Mizoram ngei pawh tibuai em emtu hripui a lo len tak avangin, heng SEDP Board hrang hrangte hnawk titu pawl an lo awm ta mai chu pawi an tih thu an tarlang a. “Heng Board hrang hrangte hi an awm mai mai lo va, nasa taka hna thawk tawhin an thawk mek zel a ni,” an ti a. He hripui leng karah pawh hian Board-te pawhin tangkaina an lo nei zel nia tarlangin, he hrileng avang hian Mizo mipuite hian intodelh kan mamawh dawn chauh thu leh chumi atan chuan heng Board-te tangkaina tam tak hi hmuh theiha a la rawn lan chhuah zel an beisei thu an tarlang bawk.