Dawr hawn dan tur siam thar

Serchhip District Bawrhsap, Dr. Lalzirmawia Chhangte chuan inkharkhip thawh lina kalpui meka Serchhip-a dawr hawn dan tur a ruahman.

Hemi chungchanga DC thuchhuah chuan COVID-19 hrileng avanga Lockdown pawhsei leh a nih thu tarlangin, hemi atana Mizoram sawrkar in inkaihhruaina Dan a siam angin Serchhip Town chhunga VC-IV leh VC-VII area-a dawr te chu ni khat danah an inhawn chhawk ang tih a tarlang a. Dawr te hi Group A leh B-ah then niin Group A Dawr te chu May 18, 20, 22, 26, 28 leh 30-ah te hawngin Group B te chu May 19, 21, 23, 25, 27 leh 29-ah te hawn tur a nih thu a tarlang bawk.

Serchhip khawpui chhunga sa leh chaw-hmeh zawrh chungchanga inkaihhruaina pawh Bawrhsap thuchhuah hian tarlangin, thuchhuah lo siam tawh angin Sa leh Chawhmeh zawrh leh lei reng reng mahni chenna Veng chhungah chauh kalpui tur a nih thu te, Chawhmeh leh sa zuar tur emaw, a lei tur emaw tumahin veng dang pan phal a nih loh thu te, VLTF tin ten an huam-chhunga mipuiten an veng chhung ngeia chawhmeh leh sa an lei theih nan ruahmanna an siam tur a nih thu te, Chawhmeh leh thildang mamawh leia pawn chhuak reng rengin Social Distancing ngaihpawimawh tur a nih thu leh hmai tuamna (mask) vuah ngei bawk tur a nih thu te a tarlang bawk.