Latest News

Chapchar Kut hlut dan ngaihtuah a tul

Image
Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

Sikulpui leh Sikulsen Mizoram Synod kutah hlan a ni

Aizawl-a Sikulpui leh Sikulsen chu Mizoram sawrkar kut-a kum 68 zet a awm hnuah nimin khan Mizoram Synod kutah hlan let leh a ni a, Sikul hlan letna inkhawm hi Sikulpui Hall, Sikulpuikawn-ah neih a ni.
Zosap Missionary, Zosaphluia’n kum 1898-a a din, kum 1905-a sikul building sak ‘Sikulsen’ tih leh kum 1914 a sak ‘Sikulpui’ tih building leh a ram te, sikul bungrua zawng zawngte chu Mizoram sawkarin kum 1952 khan Kohhran kut atangin a la a, kum 68 zet sawrkar kuta a awm hnuah a tira dintu leh neitu Mizoram Synod kutah nimin khan hlan let niin School inhlanna lehkha ah hian School Education Department aiawhin Esther Lalruatkimi, Commissioner & Secretary-in hming a ziak a. Mizoram Synod aiawhin Moderator Rev R.Lalchangliana’n hming a ziak a ni.
Sikulpui leh Sikulsen Mizoram Synod kuta hlan let hi nikum April 22-a Council of Ministers Meeting chuan a remtih hnuah nikum May 29 khan neitu nihna chu School Education Department-in Mizoram Synod kutah a lo hlan tawh a. Amaherawhchu School Session kalpui laklawh lai anih avangin sawrkarin a la enkawl zui zel a. Nimin khan ram leh bungrua te a takin hlan a ni ta a ni. Sikul hlan letna hunah hian School Education Department-a Officer-te, Synod puipate leh Synod Education Board Member-te an tel a ni.

Comments

Popular News (Last 30 Days)