ZPL Special Session koh dilna ZPM in thlawp

ZPM Legislature Party (ZPL) in MLA hlawh hlui-a kir leh tura Special Session koh an dilna chu ZPM chuan an thlawp thu sawiin, COVID-19 chungchangah mipuite chu thlamuang tak leh fimkhur taka awm turin an chah bawk.
Nimin-a thuchhuah an siamah ZPM chuan ram dinhmun, sawrkar chhung leh khawtlang ah, sum harsatna namenlo thleng mek tih ziaawmna a nih beiseia MLA-te hlawh hluia kir leh tura ZPM Legislature Party-ten ngenna an siam leh a rel tura Special Session koh an dil chu lawmawm an tih thu sawiin, MLA te chu thlawp vek tur leh, sawrkar dinglai pawhin tihlawhtling ngei tura an ngen thu an sawi a. Chief Minister sawi angin, Budget passed hnuah hripuiin Budget chu awmze nei lovah a rawn chantir ta nia sawiin, hei vang hian nasa taka siamrem a lo ngai ta a, Cabinet Meeting-in siamrem mai lovin, Budget siamtu pangngai House Member-te ngeiin kokim taka thukhawmin relho leh se, chu chu tihdan tur dikah an ngaih thu an sawi.
Hemi hma niminpiah tlai khan ZPM Legislature Party (ZPL) an an Leader, Lalduhoma hovin Mizoram Larsap, PS. Shreedharan Pillai chu a Pisa-a hmuin Mizoram State Legislative Special Assembly ko tura ngenna an thlen a. COVID-19 hri leng mek vangin Mizoram mai ni lo, India ram pumah haratna a thleng nia sawiin, Special Assembly hi koh a nih chuan sum leh pai-a Mizoram in harsatna a tawh mek siamtha tura tih theih tam tak a awm nia an hriat thu leh sum hmanna tur ruahman, tun dinhmuna tul ta lo nia langte chu paih a, siamthat a nih theih nan leh Mizoram mipui that tlan nan he hmalak hi neih ngei tul an tih thu an thlen bawk a ni.
ZPM chuan COVID-19 hri vei tamna, State pawn atanga rawn haw te chu hri kai lova an rawn inven avanga fakawm an tih thu pawh sawiin, Hnam pum himna atan a ni tih hriaa thuawih taka hrehawm tuara an inkhunghran avanga lawmawm an tih thu an sawi a. Tuna State pawn atanga rawn haw leh zel turte pawh fimkhur tura chahin, Mizoram mipuite pawh thlamuang tak leh fimkhur taka awm turin an chah bawk.
Hetihlai hian MPC General Hqrs. a Treasurer, V. Lalthazuala chuan ZPM Legislature Party in Assembly Special Session ko tura Larsap an ngen chu Mizoram sum dinhmun an vei vang lam aiin, sawrkar dinglai tihbuai tum hrim hrimna leh mipui laka tlaktlum an tumna vang chauh ah an ngaih thu a sawi a. “Special Session koh hi tul tiin vei tak tak nise, Congress, BJP MLA te thurual pui-ah sawmin, thukhat vua in an nawr tlang ngei tur a nih laia, anmahni tânghma hâi nan chauha hmalakna an kalpui hian, an thilphût leh nawr an vei tak tak lohzia a tichiang hle ah MPC Party chuan kan ngai,” tiin COVID-19 dona atana MLA Fund an dawn thawh tura an lo rel tawh chu thehlut tura an phut thu a sawi bawk.

Comments

Chhiar Hlawhte