ZPL in hlawh hlui lakna tur Bill House-ah putluh an duh

ZPM Legislature Party (ZLP) chuan Special Session koh an duh thu leh MLA te hlawh hlui zawk anga hlawh an lak theih nana Finance Minister in Bill pulut se an duh thu an sawi.
ZPM Legislature Party hi nimin khan Aizawl-ah thukhawmin hemi hnu hian an Secretary, Dr. Vanlalthlana chuan kan sawrkar chu Special Session ko tura an phut thu hi a sawi a, he Special Session neih turah hian Bill pahnih putluh an duh thu sawiin, Sawrkar sum hmanna tur nasa taka a danglam tak avangin kum tawp-a Supplementary Demand for Grants tam tak putluh leh a nih tawh loh nan Budget Re-Appropriation Bill pulut tura an duh thu a sawi a, “A tlachawpa sum hman tur dapchawp lovin, Sawrkar-in sum a hmanna leh hmuhna tur hi chiang lehzualin buatsaih rawh se,” an tih thu a sawi.
Hei bakah hian MLA te chu mipuite hma-hruaitu tur an nih angin, inrenchemna ken-kawhna atan MLA te hlawh tihpunna dan kha tihbo ni se la, kan sum dinhmunin a zir loh avangin MLA te hlawh hlui zawk anga kan lak leh theih nan kan Finance Minister hian Bill rawn pu lut rawh se, an tih thu a sawi bawk.
ZPM Legislature Party thukhawm chuan kan State sum dinhmun a chhiat viau lai leh sawrkar hnathawk hlawh hial pawh pek kim a remchan loh laia party workers ho inhlawhna tur atana contract in pek a la ni zel chu pawi an tih thu pawh sawiin, “Mipuite an harsat laia hetianga induhsak bikna lo kalpui hi kan remti lo a ni,” an ti a. Kan sawrkarin inrenchemna a kengkawh duh a, a hna-thawkte leh mipui sum a mamawh a nih chuan sum a hmanna tur leh a hman dan tur hi chiang takin tar lang phawt rawh se, an ti a. Sawrkarin inren-chemna (austerity measure) a kalpui dan chu an la duhtawk lo tih pawh sawiin, “Hei aia nasa leh awmze nei zawk hian kalpui rawh se,” an ti bawk.

Comments

Chhiar Hlawhte