Sawrkar inrenchemna kawnga kal dan tur Finance Department in a tichhuak ta

Mizoram sawrkar-a Council of Minister thukhawm in COVID-19 hri leng avanga inrenchem alo rel tawh angin Mizoram sawrkar-a Finance Department chuan inrenchemna kawnga kal dan tura ruahmanna hrang hrangte chu thuchhuah siamin a tichhuak ta.
Hemi chungchanga Finance Department thuchhuah in a tarlan danin Sawrkar sum renchemna turte hi Budget Estimate (BE) hnuaiah Office Expenses chu ni 45 lai lockdown kalpui anih tawh avangin Office-ah sum hmanna a tlem phah angin BE 2020-21 atangin 25% in tihhniam a ni a. Domestic Travel Expenses pawh 35% a tihhniam niin amaherawhchu hei hian Police Department, Health Department leh Deputy Commissioner Office te a huam ve lo thung a. Food, Civil Supply & Consumer Affairs Department tih loh Department dangin Supplies & Materials-ah BE atangin 86% aia tam an hman khap a nih bakah Grants in Aid (non-salary) chu 10% in tihhniam a ni a. Sawrkar hnathawk dam lo enkawl nana sum dah chu hmun danga pawhpen rem lovin Other Charges chu 10%, Minor Works chu 25% leh Major Works pawh 15% in tihhniam a ni bawk.
Heng bakah hian State sawrkar sum hmanga India rampawn-a zin chu khap niin Advertising leh Publicity te a tam thei ang bera online hmanga tih tur a ni a, Lirthei pakhata thla khata POL pek theih zat litre 60 chu litre 50-ah tihhniam niin hei hian Department zawng zawng a huam a, Department tin ten Treasury Office-ah Proforma Bill bakah lirthei list an submit tur niin POL hman theih chin bak duty nana hman te chu Proforma hrangin Bill tur ani anga, heng duty na leh POL pekchhuahna te chu Car Diary-ah ziahluh vek tur a ni ang. Telephone/Internet/Mobile Bill GAD in a lo tuk ang te chu 25% a tihhniam vek a ni anga, Semi-Official a Officer te hman tur IT hmanrua reng reng lei phal rihloh niin Computer leh Laptop lei khap rih a ni anga, amaherawhchu Scheme in a ken tel angah chuan thlahdul theih a ni ang.
Heng bakah hian tul viau a nih loh chuan State sawrkar sum-a lirthei lei leh Post siam belh khap rih niin Direct recruitment zawng zawng, MPSC leh MSSSB a lut tawh tihloh chu tihtawp lailawk a ni anga, Muster Roll/Provisional Employees leh Contract Employees te regularize-na tur pawh chawlh lailawk rih niin Compassionate appointment te pawh chawlh lailawk a ni ang a. Amaherawhchu, approval awm tep tawh te chu chhunzawm phal sak niin lirthei siamthatnaa sum senna a tlem theih nan Annual Maintenance Contract System kalpui a ni anga. Department ten June, 2020 ralhmain an tih tur theuh an tih hnuah July, 2020 kar hmasa berah Finance Department (EA) ah Report an submit tur a ni bawk.

Comments

Chhiar Hlawhte