Chanchin thar thenkhat :

Hruaihaw hna thawk mek zel

Rampum-a inkharkhip kalpui mek a nih avangin Mizoram mi State danga tangkhang te chu hruai haw mek zel an ni a, Vawiin hian Kerala atanga rawn haw mi 100 ve te chu Badarpur (Assam) rawn thleng tura beisei niin Ningani-ah Bangalore atangin Karnataka a tangkhang mi 1500 bawr vel leh Inrinni-ah Delhi atangin chutiang zat vel bawk lo thleng tura beisei an ni a. Tunhnaia Meghalaya atanga lo haw tura in report mi 647 te an lo thlen tawh bakah Manipur atangin Inrinni khan mi 253 an rawn thleng tawh bawk a. Hei bakah hian a tahtawla hruaihaw hna hi thawh chhunzawm zel tur a ni ang.

Ramri-a duty tur vailiam
Kolasib District-a Border Safety Monitoring Team leh Saidan Kolasib VLTF ruahmanna angin Saidan Branch YMA member mi 20 chu COVID-19 avanga ramri-a duty turin nimin khan an chhuak a, heng mite hi Kolasib SDO (Sadar), Vanlalchhuanawma chuan DC Office atangin a vailiam a ni. Saidan Branch YMA member te hi Phainuam-ah an duty dawn a, SDO (S) chuan State thenawm a hri vei an pun mek laiin ramri dep-a duty hna thawh chu a tulin a pawi-mawh hle tih a sawi a, hrileng mek laka Mizoram kan him theih nan duty-te uluk tak leh taima tak a tha thlah lova duty turin a sawm bawk.

Pawisafai leh Silpauline hlan
Nimin khan Thanzami, Floria Glamour, Dawrpui chuan COVID-19 laka Mizoram kan him theihna tura Duty-te tan Rs. 50,000/- leh Silpauline Pieces 40 chu MNF Vice President, Lalthlengliana hnenah a hlan. Nimin a pawisafai leh Silpauline inhlanna hunah hian MNF Vice President chuan tunlai hri leng avangin Mizote kan inhmangaihtawnna leh tanrual hun a lo lang tih sawiin, “He hripui khawvel tibuaitu hi kan ram mipuite leh sawrkar min tanrualtirtu a ni,” a ti a. MNF Party chuan tunkar chhung hian Mizoram ramri, hmun hrang hrang tlawh tur insiamin heng te hi an semchhuak dawn a ni.

Media nekchep tumna ah ngai
ZPM Thalai President, Malsawmzuala chuan Inrinni kalta-a Chief Minister, Zoramthanga'n chanchinbumite a kawmnaa amah tawiawmtu I&PR Minister, Lalruatkima chuan chanchinbu-a headline-a awm tura an lo beisei a awm loh thin thu te, sawrkar protocol chanchinbu lama ngaih pawimawh a tul thute a sawi nia sawiin, hei hi chanchinbu mite thuneihna hmanga nekchep tumna ah an ngai tih an sawi a, hetiang hi thleng tawhlo se an duh thu a sawi bawk.

Chawngte kawng laih en
Chawngte Group YMA hruaitute chuan nimin khan Chawngte leh Lunglei inkar kawng laih hna thawh mek chu a hmunah tlawhin an hnathawh te an enpui a, he kawng laih hna hi APS Company ten thawh mekin Chawngte Group YMA hruaitute chuan he kawng hi an chak lakna pui ber a nih avangin Furpui lo thleng turah harsatna an thawh loh nan theih-tawp chhuaha hma la tura an ngen bakah an hnathawh chu an vil reng dawn thu an sawi bawk.

Comments

Chhiar Hlawhte