COVID Health Centre tur buatsaih hna thawk

Serchhip-a COVID Health Centre atan Serchhip Chanmari Veng-a Nursing School sak zawh tawh chu hman tum a ni a, nimin khan Serchhip-a Health Department Staff te leh Chanmari Branch YMA te chuan helai hmun hi hnatlangin an tifai.

Serchhip Chanmari Veng Lawibual ram-a Nursing School tura sak hi sak zawh tawh ni mah se hun rei tak hman loha a awm tawh avangin a building leh bungrua tam tak tihchhiat a ni tawh a, tunlai-a COVID-19 leng mek chuan ziaawm lam aia zual lam a pan zel avang leh he natna vei te enkawlna tura sawrkar Department dang building hman thin te chu hman zui reng theih a nih dawn loh avangin Health Department in building a neih ang ang te chu COVID Health Centre atan hian hman tura ruahman a ni a, Serchhip-ah chuan COVID Health Centre atan hian Nursing School hi ruahman niin nimin khan hnatlang in a hmunhma thenfai hna hi thawh a ni ta a, he hunah hian Health Department Staff te bakah Chanmari Branch YMA atangin mi 100 vel zet an thawk a ni.

Serchhip-a Nursing School tur sak-ah hian Eng pekna tihfel ala ni lova, tui dahkhawlna tura Tuizem an dah te chu a chhiat tawh bakah a chhunga Electric wiring leh inthiarna te chu nasa taka tihchhiat a ni tawh bakah a bang atana Darthlalang hman te chu a keh nasa tawh hle a, a panna kawng erawh siamthat a ni tawh thung.