Chanchin thar thenkhat :

COVID-19 kai pung chho zel

Tunlai-a khawvel in a buaipui, COVID-19 kai chu India ramah nasa takin an la pung ve zel a, nimin thleng khan Indi rampum ah he hri kai hmuhchhuah hi mi 1,06,750 tling tawhin enkawl dam pawh an pung ve zel a, tun thlengin he natna kai zingah enkawl dam mi 42,297 awm tawhin hei hi hri vei zat atanga chhutin zaa 39.62 an tling tawh a ni. Hetihlai hian he natna kai zinga nunna chan pawh mi 3303 zet tling tawhin hei hi zaa 3.09 an ni bawk. Tun dinhmunah he hri kai enkawllai mi 61,149 an la awm mek bawk a ni.

Mamit kawng sial mek tlawh
Road Infrastructure Development Board Vice Chairman, Er. H. Lalzirliana leh Road Infrastructure Board members- te chuan nimin khan NH 44A, Aizawl atanga Mamit kaltlanga Tripura panna kawng siam mek chu an tlawh a. He kawng laih meka hnathawh mekah hna harsa lai leh lunghmun lai Dampui khawhnuai laih tlang a ni ta chu lawmawm a tih thu a sawi a. Helai kawng hi laih tlang a nih tawh chuan Motor eng chi hmang pawha zawh theih turin chak takin metal hna thawh chhoh tum a nih thu an sawi bawk. Board Member te hian Daplui Bridge, Teirei Bridge, Darlak leh NH 44A atanga Dampui khaw panna kawng sial thar mek chu a tlawh bawk a. NH 44A Mamit khawpui luhna peng-thuam cheibawl dan tur pawh UD&PA hotute a hmunah a sawipui nghal bawk.

Minister in thilpek hlan
Champhai South bialtu MLA leh Law Minister, TJ. Lalnuntluanga chuan a bial chhunga khua leh ramri hrula Duty Post hrang hrangte tlawh-kual chhunzawm zelin nimin khan Dilkawn, Kel-kang, Mualkawi, Melbuk leh Zokhawthar te a tlawh a, heng khaw hrang hranga HSLC Exam a pass te hnenah hian Dictionary hlanin Dilkawn-ah mi 6, Kelkang-ah mi 4, Mualkawi-ah mi 11, Melbuk-ah mi 8 leh Zokhawthar-ah mi 29 te a hlan a. COVID-19 hrileng darh zel tur veng a ramri Tiau lui hrul-a rammu mekte pawh tlawhin an mamawh Thosilen a pe a, Zokhawthar Village Level Task Force kutah Buhfai quintal 12.5 leh Thosilen engemawzat a hlan bawk.

Sawrkar in theihtawp chhuah
Tuivawl bialtu MLA leh Education Minister, Lalchhandama Ralte chuan nimin khan a bial chhunga ramri-a Duty-na hmun New Vervek Tuivai kai leh Khawpuar leh Vaitin inkar Zilthawh-chhuah te tlawhin COVID-19 dona kawnga Mizoram sawrkar hmalakna hi duhthusam ni thei lo mah se, ram himna atan sawrkarin theihtawp a chhuah thu a sawi.

Inkhunghranna tur tlawh
Mizoram sawrkar in COVID-19 dona kawnga a din, Task Group on Quarantine Facilities te chuan tunhnaiah State pawn atanga lo haw tur mi sing chuang zet an awm avangin inkhunghran nan sawr-kar hmunhma ringawtin a daih dawn lo tih hriain Kohhran hrang hrangte chu an Hall leh hmunhma te hman dilin Kohhran tam takin an phalsak angin nimin khan heng hmunhma te hi Task Group on Quarantine Facilities chuan an Chairman, Esther Lalruatkimi IRS hovin an tlawh a, heng Kohhran Hall leh hmunhma neitute hian harsatna an neih te lo thlenin, heng hruaihaw turte hi dawhthei taka enkawl a tul thu te pawh a sawi bawk.

Thu diklo thehdarhtu man
Mizoram Police te chuan thuchhuah siamin May 17, 2020 khan Social Media platform Facebook-ah mi pakhatin mipui tichiai thei thu, ‘Nimin piah maia lo hawho kha sawrkar hian an hming/veng/phone no. an nei kim lo nge, kan thianten kawnglaka put ru an awm an tih hi a dik em? a hmun chu sawi lo ila a lo humtu hming thlengin an sawi thei tlat’ tih thu a post tih sawiin, hei hi Whatsapp lamah pawh a darh tih an sawi a. Hetianga thudik lo leh mi rilru tichiai thei post tu kum 42 mi, Sai-rang Vengsang ami chu thu zawhfiah a nih thu leh thubuai ziahluh a nih tawh thu an sawi bawk.

CM Relief Fund-ah hlan
Congress Legislature Party MLA te chuan an May thla hlawh zawng zawng (100%), Rs. 4,00,000/- chu nimin khan Chief Minister, Zoram-thanga hnenah COVID-19 dona atana hman tangkai turin an hlan a. He an sum pek hi CM Relief Fund-ah chhunluh nghal a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn