MZP in Zirlaite chawimawi

Kumin a HSLC Exam Result tihchhuah taka Top-10 a lang Mizo zirlai te chawimawina hun chu nizan hmasa khan MZP General Hqrs. chuan an buatsaih.

HSLC Exam-a Mizo zirlai tithate chawimawina hun hi IGNITE Studio-ah neih niin he hun hmanpuitu Higher & Technical Education Minister, Dr. R. Lalthangliana chuan Zirlaiten thiamna belhchiandawl an neih a pawi-mawh thu leh kan ram hian Central Service leh All India Service kan mamawh em em thu a sawi a. Chutih rualin Doctor Speciality nei kan mamawhna a sang em em bawk tih sawiin, “Kan ramin kan mamawhna te hriain thalaite nasa zawka kan tan angai a. Mizo kan nih angin Mizote chu kan thil tihna kawng hrang hrangah a tha zawngin kan danglam bik tur a ni,” tiin zirlaite a fuih bawk.

He hun hi MZP General Hqrs. Vice President, Peter Chhangte chuan kaihruaiin MZP President, B. Vanlaltana chuan Mizo thalai Central Service-ah tling kan tlem ta lutuk chu kan hnam tan a pawi hle dawn tih a sawi a. “Ram leh hnam tana ding tur Mizo thalai IAS leh IPS kan mamawhna a sang zel a. Mizo zirlaite kan tan angai ta takzet a. Kan pi leh pute atanga hnam huaisen kan nih angin he kan ram leh hnam kal zel turah hian huaisen takin hmalam pan zel turin zirlaite kan tan a ngai a ni,” a ti bawk.

MZP hian kum 1995 atang khan HSLC Exam-a Top-10 a tling Mizo zirlaite chu chawi-mawina a lo hlan tawh thin a, kumin hi a kum 25-na niin Zirlai tithate hi chawimawina thuziak an hlan theuh bakah Topper tan Rs. 10,000/- leh midang tan Rs. 5000/- theuh bakah lehkhabu hrang hrang hlan an ni bawk. Heng zirlaite hi nimin khan Dr. R. Lalthangliana chuan a Pisa-ah kawmin chawimawina leh lawmpuina pawisafai Rs. 3,000/- leh Oxford Dictionary a hlan a, GIG Motors neitu, John Lalpeka chuan kum khat chhung Scholarship a pe bawk ang.