Task Group on Quarantine Facilities in mipui, Kohhran leh VLTF/LLTF chungah lawmthu an sawi

Mizoram sawrkar in COVID-19 dona kawnga a din, Task Group on Quarantine Facilities-a Chairman, Esther Lalruatkimi chuan COVID-19 laka kan him tlan theihna tura Sawrkar hmalakna te tha taka an thlawp avangin Mipui, Kohhran leh VLTF/LLTF chungah lawmthu a sawi.

Hemi chungchanga thuchhuah a siamah Task Group on Quarantine Facilities-a Chairman, Esther Lalruatkimi chuan COVID-19 hri lêng laka kan ram a him theih nan leh invenna atan Sawrkarin kawng hrang hrangin hma a la mek tih sawiin, sawrkar hmalakna pawh mipuiten kan tawiawm thain, India ram State dangte fak khawpin thawhhona a tha tih a sawi a. He COVID-19 boruakin Mizoram a tuam tirh atangin State pawn atanga lo haw te himna tur leh kai palh an lo awm pawha midangin an kaidarh lohna tura Sawrkar hmaläkna pawimawh tak pakhat chu Quarantine Centre uluk taka siam a khunghran ngaite khunghran leh uluk taka enkawl a ni tih sawiin, hemi atan hian Sawrkar hmunhma remchang apiang hman a nih thu leh hun a lo kal zelah kan Mizo pui tam tak, State pawn a tangkhangte tan haw theihna remchang alo awm tak thu leh heng lo haw mekte awmna tur atan hian a theih ang angin sawrkar building leh vantlang hmunhma remchang ang angte dap belh zel a ni tih a sawi a. Khawsakna atana hrehawm lutuk lo tur hmun, toilet leh insilna mumal deuh tal an neih theih dan turte ngaihtuah a ni tih a sawi bawk.

Task Group on Quarantine Facilities-a Chairman chuan inkhunghranna atan hian kan sawrkar hmunhma ten min daih thei dawn lova hriain kan Kohhran hruaitute hnenah an hmunhma te hman inthlahrung taka an dil tak thu pawh sawiin, Kohhran hruaitute hian inhawng taka lo dawngsawngin, an hmunhma tha ber ber te an hman tir nghal thu a sawi a. “Mizorama Kohhran hrang hrang te- Mizoram Presbyterian Kohhran, Mizoram Baptist Kohhran, Salvation Army, Catholic Church leh United Penticostal Church te chungah Task Group on Quarantine Facilities te kan lawm em em a, Mizoram sawrkar hmalakna ah nasa takin min pui a. Heng Quarantine Centre atana hmunhma min hmantirtu Kohhran leh Pawl hrang hrangte, Sawrkar Department te, heng Quarantine Centre lo buatsaih a lo enkawl zuitu VLTF/LLTF te chungah pawh lawmthu kan sawi tak meuh a ni,” a ti bawk.