Hmarcha sawngbawl thei ta

Siaha District Bawrhsap, Bhupesh Chau-dhary IAS chuan nimin khan Siaha DC Conference Hall-ah 'Maraland Organic Chilli Powder' a tlangzarh a, he hunah hian Siaha DC chuan Zyhno tlangdung khua te hi Hmarcha thak tha chi tharchhuak hnem khua an nih thu leh Market a that vak loh avang leh a phorona khawl te a awm loh avangin kum khatah vawikhat chauh an tharchhuak thin tih sawiin, kuthnathawktute sum lakluh a pun theih nan leh kum khat-a vawi khat aia tharchhuah dan ngaihtuahin Chilli Powder Processing Plant din chu tih makmawha ngaia hmalak a nih thu a sawi bawk.

Chilli Powder Processing Plant siam tur hian RKVY Scheme atangin Pack House, Store house, Collection Centre leh Drying Solar Tunnel 3 siam niin Bharat Petroleum Corporation Limited (BPCL) te CSR (Corporate Social Responsibility) fund atangin Chilli Pulverizer, Packing Machine, Sealing Machine leh Weighing Machine te ruahman a ni a. Mission for Integrated Development of Horticulture (MIDH) Scheme atangin Electric wiring zawng zawng, Cementing Solar Tunnel floor leh Basins te ruahman a nih bakah MNREGA atangin Water Tank siam a ni a, hlawhtling takin Chilli Powder Processing Plant chu din fel a lo ni ta a ni.

He Chilli Powder Processing Plant hi Zyhno khua-ah bun niin Zyhno, Ahmypi, Khopai, Siatlai, Chheihlu leh Laki khuaa hmarcha chingtu mi 283 te chu Self Help Group 25-ah thenin, Maraland Chilli Grower Association, Zyhno an din a, Hmarcha ro Kg-a Rs.150/- a hralh thin chu herhdip a a ni hnuah 50gram pack hi Rs.35/- niin Hmarcha ro Kg khat atangin Rs.700/-lai a leichhuak thei dawn ta a ni. Solar Tunnel hmang hian Fur khawhnawng-ah pawh Hmarcha hi phoro thei alo nih dawn tak avangin kum khat ah vawi 2 tharchhuah theih in beisei a ni bawk.