Chief Secretary hovin tlawh

Mizoram sawrkar in COVID-19 dona tura a din, Task Group on Quarantine Facilities chuan nimin khan State Level Task Force Chairman leh Chief Secretary, Lalnunmawia Chuaungo hovin Aizawl khawpui chhung veng thenkhata inkhunghranna hmunte an tlawh.
Heng hmun an tlawhna ah hian Chief Secretary, Lalnunmawia Chuaungo chuan Mizoram chu India ram hmun dang zawng aiin a fimkhur a, State dang atanga lo haw te endik vek niin, an fihlim nia hriat hnuah chauh inkhunghranna hmunah kaltir an ni, a ti a. Hetianga test paltlangte hi hmun thenkhatah phei chuan khunghran ngaiah pawh an dah tawh loh laiin Mizoram erawh chuan fimkhur thilah ni 14 kan khung leh vek a ni, a ti a. Ni 14 khunghran an nih tawh chuan an chhungte bulah an awm thei tawh a, amaherawhchu, pawn chhuah loh te, mask vuah that leh kut sil ngun te an tih that a pawimawh a, an chhungte nen an fimkhur zui zel a tul a ni, a ti bawk.
Chief Secretary chuan thlawhna hmangin kan Mizopuite an la rawn haw zel dawn tih sawiin, thlawhnaa chuangte hi test paltlang an nih avangin khunghran ngailo tih an ni a, hei pawh hi Mizo-ram-ah chuan fimkhur thilah quarantine zel an ni dawn tih a sawi a. Home Quarantine chungchang sawiin Chief Secretary chuan inthiarna an intawm loh theih chuan a him a, hmundanga khunghran ai pawhin a him zawk dan a awm a ni, a ti.
Chief Secretary chuan inkhunghranna bula chenna In te leh an awmna bul kawnga  kal te chu mi thenkhatten an hlauthawng thin tih pawh sawiin, hei hi hlauh tur a nih loh thu leh COVID-19 chu boruaka leng a ni lova, khuh leh hahchhiau a chil per leh hnaptui atangte a darh a nih avangin Quarantine Centre bula kal chu hlauhthawnna tur chhan engmah a awm lo, a ti bawk.
Task Group on Quarantine Facilities te hian  Electric veng, Venghlui, Republic Veng, Venghnuai leh Dinthar Veng-a Quarantine Facility-te tlawhin VLTF leh Kohhran hruaitu ten an lo dawngsawng a ni.

Comments

Chhiar Hlawhte