Serchhip District-a Bank hmalakna thlirho; CD Ratio in Target ruahman sa ala phaklo

Serchhip District Consultative Committee (DCC)/District Level Review Committee (DLRC)/District Level Security Committee (DLSC) chu nimin khan Serchhip DC’s Conference Hall-ah \hukhawmin Quarter Ending (January-March, 2019) chhunga District chhunga Bank hrang hrang te hmalakna an thlirho.

Serchhip DC’s Conference Hall-a he \hutkhawm ah hian District Bawrhsap, Sangchhin Chinzah chuan Bank te chu ram hmasawnna hnathawktu pawimawh an ni tih sawiin, Bank kaltlangin sawrkar pawhin hmasawnna hnathawh tam tak a nei tih a sawi a. Chuvang chuan kan District in hmasawnna ke kan penna kawngah Bank te an pawimawh em em tih sawiin, tun Quarter thlirlet chhunga Serchhip District Credit Plan hmasawnna (achievement) 74.75% chu quarters dawtleh-ah chuan 85% tal tlin tum a duh thu sawiin, Credit Deposit Ratio (CD Ratio) ni tura beisei 60% pawh 46% chauh a ni chu a hniam lam a nih thu a sawi bawk.

He Meeting-a pharh, March 2019 Quarter tawp-a Serchhip District chhunga Bank hrang hrangte hmalakna tlangpui-ah Financial Inclusion Plan hnuaia hmalakna ah mihring 2000 aia tlem chenna khaw 11-ah Indian Post Payment Bank (IPPB) hmalakna in Core Banking Solution Facility dah tawh an ni a. Dah hmabak la awm khuate hi kumin September thla ralhmain tihfel tum nise tiin rawtna a siam nghal a. Social Security Scheme hnuaiah PMJDY Account thar 214, PMJJBY Account thar 236, PMSBY Account thar 361 leh APY Account thar 22 hawn a ni a. APY Account-ah hian United Bank of India (UBI) in Account hawng thar hnem berin, a dang zawngah Mizoram Rural Bank (MRB) chuan an hawng tam ber vek a ni.

Bank hrang hrang te Credit Plan lakkhawmin Agriculture-ah Target cheng nuai 2084.54 a nih laiin a taka hlawhtlinna chu cheng nuai 1479.43 a ni a, hei hi za zela 70.97% a ni. Industry-ah target cheng nuai 1582.2 a nih laiin puitlin zat 1141.37 niin za zela 72.14% puitlin a ni a. Service Sector-ah Target cheng nuai 1395.58 niin tih puitlin zat chu cheng nuai 1163.16 a ni a, hei hi za zela 83.35% a ni bawk a. Crop Loan-ah Target cheng nuai 1190 a nih laiin a taka puitlin chu cheng nuai 258.57 a ni a, za zela 21.73% puitlin a ni bawk. Bank hrang hrang ten sum an dawn a\anga Loan an pekchhuah, Credit Deposit Ratio chu za zela 60 tal ni tura beisei niin he hun chhung hian District pumah Bank-a sum dahluh chu cheng nuai 28375.61 niin Advances pekchhuah chu cheng nuai 13132.45 chauh a ni a, hemi ang hian CD Ratio chu 46% niin Meeting chuan Quarters dawtleh-ah chuan CD Ratio sang zawk nei tura Bank hrang hrang ten hmalak ni se an ti bawk.

Heng bakah hian Bank hrang hrang te hmalakna dang chipchiar taka sawiho a ni a. Hmasawn an mamawhna lai te, harsatna an tawhna lai te leh hmalam zel atana mamawh thil chi hrang hrang te members ten an sawiho a, sawrkar department hrang hrang ten Bank kaltlanga hmalakna an kalpui hote pawh chipchiar deuh takin vawiin hian sawiho a ni bawk.