Chaltlang to Durtlang Ropeway siam tum High Tension Line vangin hmalakna chawlhsan

Toursit Lodge, Chaltlang to Durtlang Ropeway siam tum chu a kalkawng turah harsatna a awm vangin chhunzawm theih a nilo a, Tourism Department chuan AR Ground to Zemabawk a sawn turin ruahmanna a siam a, tun thla chhungin Technical Survey Team ten an rawn endik dawn.

Nimin a Assembly Budget Session zawhna leh chhanna hunah MNF member, Dr. ZR. Thiamsanga zawhna leh member dangte zawhbelhna chhangin Tourism Minister Robert Romawia Royte chuan, Tourism Department in Tourist Lodge, Chaltlang to Durtlang Ropeway siam a tum chu a kalkawngah High Tension Line pathum a awm vangin chhunzawm theih a nilo tih a sawi a, he harsatna hi chinfel a nih loh chuan chhunzawm theih a nilo tih a sawi. Tourism Minister chuan Ropeway siam tura harsatna awmte chu sawrkarin chinfel a tum mek tih sawiin, a siamtu company chu Ropeway & Resorts Pvt. Ltd. Kolkata te an nih thu leh a senso zat tur chu cheng nuai 2482.58 a nih thu a sawi bawk. Tourism Minister chuan Ropeway kalkawng turah High Tension Line pathum (3) awm kaltlanga Ropeway siam tum a nih thu leh amaherawhchu hei hi a theih loh tih sawiin, Central sawrkar a Power Secretary a sawipui tawhna ah Central sawrkar a Power hotute chuan High Tension Line sut theih a nih loh thu an rawn hrilh niin a sawi.

Sawrkar hmasa hunah khan Ropeway hi Hmuifang lama sawn tumna alo awm tawh tih sawi bawkin, Tourism Minister chuan Central sawrkar lamin mipui an tlem vangin sawn an remti lo tih a sawi a, tunhnai ah Ropeway hi AR Ground to Zemabawk ah sawn tumna a awm tih sawiin, tun thla ni 26-ah Technical Survey Team ten an rawn enfiah dawn thu a sawi a, hetihlai hian Ropeway siamna tura ruahmanna awm tawh chu sawn a harsat \hin vangin a hlawhtlinna turah beiseina a sang vak theilo tih a sawi bawk.

Tourism Minister chuan Champhai District chhung khaw 6; Vangchhia, Hnahlan, Khawbung, Chawngtlai, Zokhawthar leh Khawbung-a Rural Home Stay kalpui ah tun thlengin mikhual 1300 chuang an thleng tawh tih member te zawh belhna chhangin a sawi bawk a, Rural Home Stay chu tun thlengin Unit 35 cover mek a nih thu leh Unit pakhat tan cheng Rs. 2,29,000 zel ruahman a nih thu a sawi a. Mamit District-ah Rural Home Stay hi Unit 25 leh Champhai District chhung Khawhai-ah Unit 1 siam tura hmalakna a awm mek thu Tourism Minister chuan a sawi bawk.