Zu vanga thi 5000 aiin tlem theilo - Chief Minister

Chief Minister, Zoramthanga'n Mizoram-ah kum 4 kalta chhungin Zu vanga thi chu mi 5,000 aiin an tlem thei lo hrim hrim tih a sawi.
Nimin a Assembly Session zawhna leh chhanna hunah MNF member, Dr. K. Pachhunga'n Congress kaihhruai sawrkar-in kum 2015-a Zu a zawrh \an a\anga MNF Sawrkar-in a tihtawp thlenga Zu hralh zat leh he hun chhunga Mizoram-a Zu avanga thi zat a zawhna Exicse Minister-in a chhan hnua Congress member, Ngunlianchunga'n Zu zawrh a nih chhunga Zu vanga thi zat Sawrkar-in a chhinchhiah loh thu tarlan a ni chunga Chief Minister-in kumin March ni 20-a Assembly Budget Session neih \uma Zu vanga mi 5,000 chuang an thi nia a sawi chu eng behchhana sawi nge tih a zawh belhna a sawifiahnaa Chief Minister chuan, Zu vanga thi zat hi a chiah chiah hriat theih ni lo mah se, mi tam takin nunna an chan phah tih chu thil chiang tak a ni, a ti a. Zu vanga thite chu tu chhungkua mahin an sawi duh lem lova, Zu in nasa vanga Thin \halo te pawh Zu vang a ni tih tarlang kher lovin Thin \ha lo tia ziah mai \hin a ni tih a sawi bawk.
Chief Minister, Zoramthanga chuan, Zu vanga thite chu an thihchhan zu vang tih zia lan ni kher lo mah se, kum 4 kalta chhunga Zu vanga thi chu a lo berah mi 5,000 ai chuan an tlem thei lo hrim hrim tih chu a ngaihdan a nih thu sawiin, Police zingah ringawt pawh Zu vanga thu hi mi 500 chuang an awm niin a sawi. 
Excise Minister, Dr. K. Beichhua-a'n MNF member, Dr. K. Pachhunga zawhna a channa a\anga a lan danin, March ni 16, 2015-a Sawrkar phalnaa Zu zawrh \an a nih a\anga MNF Sawrkar-in a tihtawp thleng khan Mizoram-ah Zu Litre 3,70,30,041 hralhchhuah a ni a, Excise and Narcotic Department chuan Zu vanga thi hi a chhinchhiah lo thung a ni.

Comments

Popular posts from this blog

PAN CARD an tih teh fo hi - Laldinpuia