Latest News

Oil khuahkhirhna siam

Tunhnaia ramri-a buaina thleng avanga POL Supply khaihlak thei dinhmuna kan din tawh avangin Serchhip District Bawrhsap chuan Serchhip District chhunga Filling Station ten POL pekchhuah dan khuahkhirhna a siam a. Hei hi Supply Department Director in Order alo siam tawh behchhana siam niin he ruahmanna aia tam hian POL hi pekchhuah tur ni lovin Bur-a dawh phal a ni lo bawk. Hei bakah hian Filling Station neitute chuan Petrol hi litre 2500 leh Diesel hi litre 4000 a awmin DCSO hnenah hriattir tur a ni bawk ang.

LR&S-ah Surveyor Post ruak 45 awm mek

Land Revenue & Settlement Department changtu Minister, Lalruatkima chuan Land Revenue & Settlement Department hnuaiah Surveyor post ruak 45 a awm mek thu a sawi.
Nimin a Mizoram Legislative Assembly Budget Session-a zawhna leh chhanna hunah C. Lalsawivunga zawhna chhanga he thu hi sawiin Surveyor indaihlohna avanga hna kal muang lutuk tiziaawm turin nikum lamah 10 lak a ni a, tunah erawh chuan post ruak hnawhkhat turin Surveyor lak belh tumna a awm lo, a ti bawk. Surveyor Training Institute, Hualngohmun a siamna turin PWD, Project Division-III ten kum 2006 khan Project proposal an siam thu pawh sawiin, tunah hian North Eastern Council leh 15th Finance Commissionah te funding zawn mek a nih thu a sawi bawk. Opposition Group Leader, Lalduhoma zawhna chhangin Lalruatkima chuan, Chakma Autonomous District Council huamchungah Mizoram hmundang ami te emaw, Non-Chakma dangte tana Inhmun lo ram neih phallohna dan siam a awm lo, a ti a. Inhmun lo ram neih phallohna dan CADC in siam theihna an neih leh neih loh hi Land Revenue & Settlement Department in a hriat loh thu in a chhang bawk.

Comments

Chhiar Hlawhte