Khawvel hmundangte rualin Serchhip-ah Ruihhlo hmansual leh tawlhruk dona Ni hman a ni

Nimin khan khawvel pumah ruihhlo hmansual leh tawlhruk dona Ni, International Day Against Drug Abuse & Illicit Trafficking hmangin Serchhip-ah pawh he Ni hi hman a ni a. Ruihhlo hmansual leh tawlhruk \hatlohna inzirtirna neiin ruihtheih thil tilo tur leh a tawlhrukna a inhnamhnawih lo tura intiamin Signature Campaign neih nghal a ni.

Serchhip Auditorium-a International Day Against Drug Abuse & Illicit Trafficking puala inkhawm buatsaih hi Serchhip District Dy. SP (Hqrs.), Ramfangzauva chuan kaihruaiin Serchhip Addl. SP, PC. Lal\anpuia chuan Drug Illicit Trafficking tih chuan ruihhlo Dan phal loha lo siamtu te, a tawlhtu leh tawlh a nih theihna tura lo puitu zawng zawngte nen a huam vek thu sawiin, hetiang kawnga inhnamhnawih lo turin he huna kalkhawmte chu a chah a. Serchhip District-ah hetiang ruihhlo kaihhnawih Case hi a tlem hle tih sawiin, amaherawh chu Mizoram Police ten May 29, 2019 a\anga chawlhkar hnih chhung awh ‘Operation Grand Slam’ tih hming vuaha ruihhlo dapchhuah hna an thawh ah chuan Mizoram puma Heroin Hawng 95 an man zinga Hawng 52 chu Serchhip District-a man a nih thu leh hei hian kan District chu ruihhlo tawlhrukna kawng lian tak a ni tih a lantir tih a sawi a. Ruihhlo ngai te chuan harsatna hrang hrang tawkin nunna chan phah tam tak an awm thu sawiin, hei vang hian a do tura theihtawp kan chhuah tlan a pawimawh thu leh Serchhip Police te pawhin a do tura nasa zawka \an an lak dawn thu sawiin, ruihhlo tawlhrukna kawng-a kan District an hman chu rem an ti dawnlo tih a sawi a. Hetiang ruihhlo tawlhrukna a\ang hian sum tam tak hmuh theih pawh nise ‘Ka ti dawn lo’ tia intiam \heuh turin he huna kalkhawmte chu a sawm a, ruihhlo dona kawnga NGO ten nasa taka an pui chu lawmawm a tih thu leh an \anpui zel a beisei thu a sawi bawk.
He hunah hian Serchhip District Chief Judicial Magistrate, Ngursangzuali Sailo pawhin International Day Against Drug Abuse & Illicit Trafficking chu kum 1987 a\anga hman a nih thu sawiin, ruihna atana damdawi hmansual leh tawlh te chu khawvela sumdawnna lian ber ber te zing ami a nih thu sawiin, hei hian kan khawsak phung hrang hrangah nghawng \halo a neih avangin a dona ah nasa zawka \anlak a \ul thu leh Drug Free Society ni tura hmalak a \ul thu a sawi a. Khaw-vel ah ‘Demand’ a awmloh chuan ‘Supply’ a awm theilo tih sawiin, hei vang hian ruihhlo te chu kan lei duhloh tlan a pawimawh thu a sawi a. Ruihhlo do turin zirlaite, a te ber a\anga a lian ber thlenga tihtur kan neih \heuh thu a sawi bawk.
Serchhip Sub-Hqrs. YMA Vice President, Lalzuiliana pawhin he hunah hian thu sawiin, Serchhip District-ah Drug a hluar thu leh YMA Sub-Hqrs. pawhin Sub-Hqrs. Anti-Drug Squad (SADS) dina hma a lak thu a sawi a. Heroin chu thil te tham leh man harsa tak a ni chungin kumin a \um 36 an chetchhuah tawh ah engemaw zat an man tawh thu sawiin, mipuite chu ruihhlo dona kawnga thawhpui-ah a sawm bawk.
Nimin-a International Day Against Drug Abuse & Illicit Trafficking puala inkhawm ah hian Serchhip District Hospital-a Medical Officer (OST), Dr. Zodinpuii chu Resource Person atan hmangin ruihhlo chi hrang hrang leh hman-sual a nih dan bakah ruihhlo hmansual in kan taksa a harsatna a thlen theih dan hrang hrangte zirho a ni a. He hunah hian Serchhip khawpui chhunga zirna In hrang hrang a\angin zirlai \hahnem tak an tel a. He hun hman zawh a nih hnu hian zirlai kal-khawm te chuan ruihtheih thil chi hrang hrangte ti lo tur leh a tawlhna-a inhnamhnawih lo tura intiam nan an hming an ziak nghal bawk a ni.
International Day Against Drug Abuse & Illicit Trafficking hi UN General Assembly chuan December 7, 1987 khan kumtin hman turin a rel a, June 26-ah he Ni hi hman \hin niin kumtin thupui hrang hrang hman \hin niin kumin hian 'Health for Justice. Justice for Health' tih chu thupui-ah hman a ni a, ram hrang hrangah he Ni hi hman \hin a ni.

Comments

Popular posts from this blog

PAN CARD an tih teh fo hi - Laldinpuia