Serchhip District-a Ration Chini sem tur Serchhip a\angin pekchhuah a ni ta

Mizoram sawrkar ruahmanna anga Ration Chini sem tura hmalakna kal zelah Serchhip District-a Ration Chini semchhuah tur chu Retailer hrang hrangah semchhuah a ni ta a. Hetihlai hian Serchhip District chhung hmun hrang hrangah Buhfai chhekkhawl sa \hahnem tak awmin Furpui lo thleng turah mipui tan thlaphanna tur a awmlo.

Mizoram sawrkar in mipuite hnena Ration Chini sem tura hma a lakna kal zelah Aizawl a\anga Ration Chini sem tur vailiam a nih hnuah Serchhip District-ah pawh Ration Chini sem tura inbuatsaih nghal a ni a. Nimin khan Serchhip SDC hnuaia Ration Chini sem turte chu Serchhip Supply Kudam a\anga pekchhuah niin sawrkar in ruahmanna a siam angin Ration Chini hi AAY chhungkua, Ration Card eng (Yellow) nei te hnenah semchhuah a ni dawn a ni. Ration Chini hi Ration Card pakhat-ah thla khat quota Kg. 1 zela sem tura ruahman niin tun \umah hian thla thum, January 2019 a\anga March 2019 chhunga ration tur semchhuah niin Ration Card pakhat ah Kg. 3 zel lak theih a ni ang. Ration Chini hi Retailer te hian Supply Kudam a\angin Kg. ah Rs. 23.50-a lachhuakin mipuite hnenah Kg. ah Rs. 24/- zelin an semchhuak dawn a, Serchhip District pumah hian AAY chhungkua hi 1960 an awm nia chhinchhiah niin kumin March thla hma lama AAY List-a tel ten Ration Chini hi an la thei dawn a, hemi hnu lama AAY-a ziahluh thar te chuan tun \umah hian Ration Chini hi la lovin an Quota tur ruahman a nih hunah chauh Ration Chini hi an la thei dawn a, hei vang hian DCSO Office a\angin Ration Chini la thei turte hi a List siama pekchhuah vek an ni bawk.
Ration Chini sem tur hian Retailer thlan bik awm lovin Supply Department hnuaia Retailer, AAY nei zawng zawng ten an sem thei dawn a, tunah hian Serchhip DCSO hnuaiah hian Retailer 97 a awm mek a, Serchhip SDC hnuaiah hian East Lungdar Centre, North Vanlaiphai Centre, Khawlailung Centre, Thingsai Centre leh Cherhlun Centre te awm lehin heng zawng zawng atan hian Chini hi quintal 41 a rawn thleng a. Thenzawl SDC hnuaia Centre 3- Bunghmun, Buarpui leh Thenhlum Centre tan Quintal 12 rawn thlengin Chhingchhip SDC tan quintal 8 a rawn thleng bawk a. Heti hian Serchhip DCSO hnuaia Ration Chini tur rawn thleng zawng zawng hi quintal 61 a ni a, hei hi mipui hnenah sem vek a ni dawn a ni.
Hetilai hian Serchhip-a Supply Department hotute chuan tun dinhmunah Serchhip District chhunga Supply Kudam hrang hrangah Ration Buhfai dinhmun a \ha tawk tih an sawi bawk a, Serchhip SDC hnuaia Supply Centre hrang hrang zinga Fur laia kalpawh harsa deuh, Thingsai Centre leh Cherhlun Centre-ah te chuan nakum (2020) March thla thleng atan Ration Buhfai hi chhekkhawl a nih tawh thu sawiin, Tuichangral a Centre dang- East Lungdar, North Vanlai-phai leh Khawlailung Centre-ah te pawh kumin October thla thleng daih tur Ration Buhfai hi chekkhawl a nih tawh thu an sawi bawk a. Hei vang hian Furpui lo thleng turah pawh leimin leh thil dang avangin mipui hnena Ration Buhfai sem ah harsatna awm lo tura ngaih a nih thu leh mipuite tan hlauh-thawn tur a awmloh thu an sawi bawk.

Comments

Popular posts from this blog

PAN CARD an tih teh fo hi - Laldinpuia