Sawrkar hnathawk tam zawk lakna tur chhuhsak tuma thutlukna MPCC in pawi an ti

Mizoram Pradesh Congress Committee (MPCC) chuan dik taka hna thawk \hin, an hnalak chungchangah pawh sawisel kai lo tak MPSC ring zo lova MNF sawrkarin sawrkar hnathawk tam zawk lakna tur chhuhsak tuma thutlukna a siam ta mai chu pawi an tih thu sawiin, Mizoram mipuiten sawrkar hmalakna kan dodal a ngai niin an sawi.

MPCC hian nimin khan thuchhuah siamin June 10,2019-a MNF sawrkar, Council of Ministers \hukhawm chuan sawrkar hnathawk, Group B chin lak hna chu MPSC kut a\anga chhuhsak a, hna latu tur Mizoram Subordinate Service Selection Board (MSSSB) din thara an kuta dah an rel tih tarlangin, hei hi MPSC kaltlanga sawrkar hna lak tam lutuk chhawk zangkhaina atana tih niin sawrkar thuchhuah chuan a tarlang tih an tarlang a. He hmalakna hi MNF ze dik tak, dan leh hrai pawisakna nei miah lo a sawrkar hna a Party mite thun tumna kal zelah an ngai tih tarlangin, MNF sawrkarin Group B (Non-Gazette chin) hnalak buaipuitu tur Mizoram Subordinate Services Selection Board (MSSSB) din thar tuma thutlukna a siam pawh hi tunhma lama MNF sawrkar hna lak \hin dante ngaihtuahin party mite chauh Sawrkar hna a thun tumna hmaraw dik takah an ngai tih an tarlang a. “MNF sawrkar tharin MPSC thuneihna chhuhsak a tum mek dan te, MPSC kaltlang lo-a zirtirtu 946 an lak theih nana dan awmsa tihdanglam a tum mek dante en hian kum 10 liamta a MNF sawrkar, hnathawktu lak kawnga che \awp tak leh tuna MNF sawrkar thar hi a la inang reng a, a \ha zawnga danglam tumna a la awm reng reng lo ni-ah kan ngai,” tiin an tarlang bawk.

MPCC thuchhuah chuan Congress sawrkar liamta kha sawrkar hnathawk lak chungchangah sawisel a kai lo hle nia tarlangin, Sawrkar hna lakna zawng zawng deuhthaw MPSC kutah dah a ni a, MPSC control tumin a che ngai hek lo tih an tarlang a. “MPSC hna lak reng rengah induhsakna a awm ve thiang lo a, exam-a a ti \ha berte an tlin mai \hin avangin sawisel pawh a kai lo hle. Hei hian Mizo \halai, lehkhathiam rualte zingah inelna dik a siam a, \halaite pawhin nasa takin hma an sawn phah reng a ni,” an ti.

MPCC chuan MPSC thuneihna chhuhsak tuma a hmalak mekna bansan nghal tur leh Congress sawrkarin \halaite tana inelna khawvel thianghlim a lo siam tawh chu vawng nung zel tura MNF sawrkar an phut thu sawiin, tun dinhmun ah MPSC hna a hautak deuh ni a a lang a nih pawhin thawktu lak belh a, MPSC tih len a tih chak mai chu thil \ha zawkah an ngai tih an thu-chhuah ah chuan an tarlang bawk.