Mizoram a\angin Mizoram mipuite khamkhawp buh a thar theih - Agriculture Minister

Agriculture Minister, C. Lalrinsanga chuan, Mizoram mipuiten kan khamkhawp buh hi Mizoram a\anga tharchhuah theih anga ngaih a nih thu sawiin, Mizoram buh thar tipung turin Mizoram sawrkarin Centrally Sponsored Scheme (CSS) leh SEDP hmangte hi ruahmanna a kalpui mek a nih thu a sawi.

Nimin a Assembly Budget Session zawhna leh chhanna hunah Aizawl South-III bialtu MLA, F. Lalnunmawia leh member dangte zawhna in\awm chhanga he thu hi sawiin Agriculture Minister, C. Lalrinsanga chuan Buh thar tipung turin sawrkarin ruahmanna hrang hrang a siam tih a sawi a, National Food Security Mission hnuai a\anga hlawk zawka buh thar dan tur siamin, loneitute enkawl an nih tur thu te, awlsam zawka khawl hmanga Buh phun leh seng turte leh Tractor leh Power Tiller hmangte buh chinna buatsaih tura hmalak mek a nih thu te a sawi bawk.
Irrigation & Water Resource hnuaia leihnuai verh-a Tui pump chhuahna te siam tum a nih thu te pawh sawi bawkin Agriculture Minister chuan, SEDP hnuaiah leilet siam belh theih te siam a, siamrem ngai te siamrem tura ruahman a nih te bakah, a theihna hmun apiangah kum khat a vawi hnih buh thar tura hmalakna kalpui tum mek a nih thu te a sawi bawk a. “Buh a intodelh kan tum a nih chuan kum khat-ah vawi hnih a thar theih a, chumi tur chuan hmalak kan tum a, Buh a intodelh hi hla lutuk turah kan ngailo,” a ti bawk.
Member dangte zawhbelhna chhangin Agriculture Minister chuan, Serlui bial chu Buh chinna Mizoram in a neih \hat ber te zinga mi a nih thu a sawi a, helai bial chhunga \halaite kuthnathawh kawnga \hangharh mek an awm tih sawiin, heng mite hmalakna tur atan hian Mizoram sawrkar chuan tractor leina tur pawh a sanction fel tawh thu a sawi a. Serlui bial-ah leilet hnathawk vai chhawr an tam \hin tih sawi bawkin, hemi vang hian kan tharchhuah tam zawkte phai lamah a kal \hin niin a sawi a. “Buh kan thar mekna baka zauh belh theih leh leilet nawr zawl belh tur tih ngai te, leilet a la siam loh te nen tunah hian DAO Level-a Survey nei turin an inhriattir a, ruahmanna an nei fel thuai turah an ngai,” a ti bawk.
Agriculture Minister chuan Buh chinna-ah Sangha khawi a nih tur thu te, Thlasik thlai chin a nih bawk tur thu te sawiin, hengte bakah hian Mizo ten kan ei hnem Alu chin dan kawngah pawh tam zawk tharchhuak thei turin kawng an dap mek thu a sawi bawk.

Comments

Chhiar Hlawhte

Youth Icon Top-50 thlang

PAN CARD an tih teh fo hi - Laldinpuia