MPCC Media Department in Mizoram Budget 2019-2020 zirhona an buatsaih

Mizoram Pradesh Congress Committee (MPCC) Media Department buatsaihin nimin khan Mizoram Budget 2019-2020 zirhona buatsaih a ni a. Resource Person atan Finance Minister hlui, Lalsawta chu hman a ni.

Aizawl-a Lal Thanhawla Auditorium-a Mizoram Budget 2019-2020 zirhona hun MPCC Media Department Secretary, C. Lalhriatpuia kaihhruai a neih ah hian Finance Minister hlui, Lalsawta chuan India Constitution Article 202 (1) te, Article 203 (3) te, Article 205 (1)-ah te sawrkar sum luhna zawng zawng leh hmanna zawng zawng hi mipui hriat tura State Legislative Assembly-a pharh ngei tur leh Governor remtihna lak ngei ngei a phut thu sawiin, India ram chu khawvel ramdang anga thil man to na (inflation) a san ve vak loh \hin avangin budget hi a sual tam lo viau \hin niin a sawi bawk. Lalsawta chuan kum 2019-2020 Mizoram Budget cheng vbc. 10,872 chu kum 2017-2018 a kan State sum thawhchhuah, GSDP aiin a sang zawk tih sawiin, Congress sawrkara sum inremchem taka an kalpui chuan Finance Management-ah nasa takin hmasawnna a thlen a ni, a ti a. Finance Minister a nih chhungin Economy measures (sawrkar inrenchemna) an kalpui bakah, kum 2015-2016 a\anga khan Year of Consolidation an hmang chuan state sawrkar sum harsatna a sukiang nasa hle a, sawrkar hnathawkte GP Fund pawh harsatna awm lo a pekchhuah theih a ni hial a ni, a ti.

Lalsawta chuan, party hrang hrangin ngaih pawimawh bik leh tih ngei duh an neih \hin avangin sum dah dan azirin sawrkar policy leh programme thui tak hriatthiam theih tih pawh sawiin, chutih rualin 2018-2019 budget-a Congress sawrkarin a taka department hrang hrang hnathawhna tur, Major Works atana sum tam tak a dah ang kha tun budget-ah hian an dah ve tak loh thu leh an dah chhunah pawh an dah tlem hle tih a sawi a, “Congress sawrkar lo thawh tawh kha a tawk an ti viau ah a ngaih theih a ni,” a ti a. GAD-ah ringawt pawh Financial Year hmasa a Major Works atana cheng nuai 5920 dah a nih laia nuai 660 chauh dah a ni te, School Education hnuaia Major Works atana nuai 2300 dah a nih laia kumina nuai 500 chauh dah a ni te chu mak a tih thu sawiin, “Hetianga hnathawhna tur an dah tlem em avang hian sawrkar sum indaihlohna (deficit) pawh a lan tlem phah mai mai a ni,” a ti bawk.

Mizoram Budget 2019-2020 a State sawrkarin sum lakluhna tura a tarlan tam tak chu an beisei sang lutuk deuh ni a a hriat thu pawh sawiin Finance Minister hlui chuan, P&E Department a\anga sum hmuh tur nikum lam aia nuai 10,129.52-a a tam zawkte chu Electric Bill a leta an tipung dawn a nih loh chuan a harsat a rin thu a sawi a. Chutiang bawkin Central a\anga sum hmuh tura beisei chu an beisei sang lutuk deuh ni a a hriat thu a sawi bawk.