Serchhip-ah Rickettsial leh Scrub Typhus chungchang zirhona neih a ni

Integrated Disease Surveillance Programme (IDSP) Serchhip buatsaihin nimin khan Serchhip-ah Rickettsial natna leh Rannung Seh natna (Scrub Typhus) chungchanga zirhona neih a ni.

Serchhip CMO Conference Hall-a Rickettsial leh Scrub Typhus natna chungchang zirhona hun hi Serchhip CMO, Dr. Laldawngliana Sailo chuan kaihruaiin he hun buatsaih a nih chhan a sawi a, CMO chuan Rickettsial natna chi hrang hrang a awm thu leh Scrub Typhus pawh he natna chikhat hi a nih thu sawiin, natna tharlam ni lovin tunhma lama natna awm tawh, tuna rawn lar thar a nih thu a sawi a. He natna chungchangah hian theihtawp chhuaha hmalak mek a nih thu pawh sawiin, Department chuan mipui zirtirna te neiin he natna laka kan him theih nan hma a lak mek thu a sawi bawk.

He hunah hian Dr. Lalhlunpuii, DSO, IDSP chuan he huna tel Health Department Staff te leh thuthar thehdarhtute zirtirna pein Rickettsial Disease chi hrang hrang a awm thu leh a awmna a zirin a danglam theih dan te a sawi a. He natna hi chi hrang hrangin langchhuak mah se khawsik a tel vek avangin chhan hriatloh avanga khawsik natna nei te chuan Damdawi thiam te pan vat a pawimawh thu a sawi a, he natna vei hriatchhuah te chu awlsam taka enkawl dam theih a nih thu sawiin, tun thlengin a invenna (Vaccine) erawh ala awm loh thu a sawi bawk.

Dr. Lalhlunpuii chuan Rannung Seh tia kan hriat lar, Scrub Typhus chu ramhnuai-ah te, Phul hmun leh Buh hmunah te a awm \hin thu sawiin, kum 1899-ah Japan ramah hmuhchhuah a nih thu a sawi a, tunah hian Bhutan, Nepal, Maldives, Pakistan, Thailand, Korea, China, Malaysia, Australia leh India bakah ram \henkhat ah a awm thu sawiin, hri leng anga rawn lan chang te pawh a neih thu a sawi a. Serchhip District-ah chuan Thenzawl khua ah he natna hi a hluar thu pawh sawiin, tun thlengin hmuhchhuah an la awm thu a sawi a. He natna vei te Thisen enfiah man chu Rs. 300/- vel a nih thu pawh sawiin, a enfiahna hi ASHA hnenah a awmloh avangin chhan hriatloh a khawsik te reng reng chuan damdawi In pan vat a pawimawh thu a sawi bawk.

He hunah hian C. Lalmalsawmi, District Data Manager, IDSP chuan Scrub Typhus chungchanga Serchhip District dinhmun tarlangin nikum May thla a\angin Serchhip District-ah he natna vei hi mi 700 vel hmuhchhuah an nih tawh thu leh nunna chan mi 2 an awm tawh thu a sawi a, he natna chungchangah hian chawlhkar tin District chhunga Sub-Centre leh Health Centre hrang hrang a\anga an la lakkhawm reng thu sawiin, kar kalta mai pawh khan Thenzawl-ah chuan he natna vei hi mi 9 hmuhchhuah an la awm thu a sawi bawk.