ICPS hnuaia din Jail Inspection Team in Serchhip District Jail dinhmun an enfiah

Integrated Child Protection Scheme (ICPS) hnuaia din, District Jail Inspection Team te chuan nimin khan Serchhip District Jail tlawhin naupang kumtlinglo tang an awm leh awmloh leh an dinhmun an enfiah a, District Jail dinhmun an enfiah nghal bawk.
District Jail Inspection Team in kumin sawrkar kum Quarter hmasa bera Serchhip District Jail an tlawhna ah hian Team member te hi District Jail Superintendent leh a thawhpui ten lo dawngsawngin, Serchhip District Jail-ah Danin a phut anga Naupang kumtlinglo (Juvenile) tang an awm leh awm loh an enfiah a, hei bakah hian Jail chhunga Mipa leh Hmeichhe Ward pawh fangin Jail tang (Inmates) te harsatna leh mamawh te an ngaihthlak sak a, tun dinhmunah District Jail hian harsatna lutuk an neilo a ni.
Serchhip District Jail hi September 15, 2016 khan hawn niin tunah hian thawktu Superintendent, Jailer, Warden leh Jail Nurse te bakah thawktu dang 20 chuang an awm mek a, Serchhip District Jail hi Jail tang Mipa 125 leh Hmeichhia 40, an vaiin mi 165 tan theihna tura ruahman niin nimin a he Jail an tlawh lai hian Jail tang mipa 57 leh hmeichhia 8, an vaiin 65 an awm mek a, Jail enfiahtute hian Nu te tan vang emaw, kum sawi naupan avanga kum tlinglo tang an awmloh thu an sawi a. Tuna Serchhip District Jail-a tang mek zinga mipa 44 leh hmeichhia 8 te chu an thubuai ngaihtuah lai niin mipa 13 te chu an thubuai ngaihtuah fel tawh an ni thung.
Integrated Child Protection Scheme (ICPS) hnuaia din 'Jail Inspection Team' ah hian Principal Magistrate chu Chairman niin District Child Protection Unit a\angin Member Secretary ruat an nih bakah member mi 7 awmin heng te hi Dan in an nihna a\anga a ruat te an ni a, Quarter tinin Jail dinhmun hi an enfiah \hin a ni. Heng Jail tlawhtute hnenah hian Jail enkawltute chuan an mamawh leh harsatna an nei te pawh lo thlen nghalin, khawchhung a\anga District Jail panna kawng (Approach raod) chu tuaihnum sak an duh thu te, Jail-a tang mek an chhungten an kan/tlawh hun leh Ni (Visiting Day/hours) an siam chu mipui ten ngai pawimawh a zawm tura an duh thu te, Jail tang te tan Jail chhungah Kutthemthiam zirna lam (Vocational Training Centre) changtlung tak an mamawh thu te an sawi bawk a. Heng bakah hian harsatna lutuk an neihloh thu sawiin, sawrkar a\anga ei leh in tur an dawn tur ang te pawh an dawn \hat thu an sawi bawk.

Comments

Popular posts from this blog

PAN CARD an tih teh fo hi - Laldinpuia