Mizoram sawrkar Budget thar tur a tlangpui-a sawihona Assembly House-ah neih \an a ni

Assembly Budget Session neih meka Finance Department enkawltu, Chief Minister, Zoramthanga'n Ningani kaltaa Sawrkar kum kalmek, kum 2019-20 chhunga Mizoram sawrkar sum hman tura ruahman a pharh chu nimin a\ang khan sawiho \an a ni.

Budget a tlangpui-a sawihona nimin a neih ah hian rorellai member-te chuan MNF kaihhruai sawrkar-in Budget puitling a pharh hmasak bera SEDP tihhlawhtlinna tur cheng vbc. 750 dah nghal a ni chu lawmawm an tih thu an sawi hlawm a. He hmalakna hmang hian Mizoram chu ei leh bara a intodelh theih an beisei thu te, kuthnathawktu leh mi harsa zawkten leirem an rah theihna hmanraw \angkai tak a nih theih an beisei thu an sawi a. SEDP hmanga hmalak tumna piah lamah hian District thar tih changtlun nan cheng vbc. 8.55 ruahman a ni te, zirna siam\ha tura zirtirtu indaihlohna phunruk nan cheng vbc. 30 dah a ni te, kawng siam nan cheng vbc. 150 dah te, Health Care schem atan cheng vbc. 20 dah a ni te, tuna Health Care Scheme hman mek tihchangtlun nan Health Care Corpus Fund-ah cheng vbc. 50 dah a ni te, Mizoram State Sports kalpui nan cheng vbc. 1.5 leh infiammite tihphur nan leh chhawmdawl nan Incentive Cash Award pek tur cheng vbc. 1 dah a ni te, kawngpui thawm\hatna atan PWD Road Fund Board hman tur cheng vbc. 50 dah a ni te, MLA LAD Fund cheng nuai 50-a tihpun a ni chu lawmawm an tih thu an sawi a. Lokayukta din fel a ni leh a enkawlna atan cheng vbc. 3.71 dah a ni chu hmasawnna ropui tak a ni tih an sawi hlawm a ni.

Hetihlai hian eptu lam MLA-te chuan pharh takah chuan thil thar a awm meuh lo nia sawiin, a hranpaa han lawm viau nachhan tur awma an hriat loh thu an sawi hlawm a. Tunhnai chhovah mipui sum thawhchhuah GDP chu sang chho viau mah se, heng te hi Tui leh Electric Bill sang leh sawrkar hnathawk hlawh pung vangte a nih hlawm avangin GDP chu mipui sum thawhchhuah tehna atan a rintlak ber em tih ngaihtuah theih a nih thu an sawi a, mipui sum thawhchhuah tipung turin thil siamchhuahna lama \anlak \ul an tih thu an sawi. Chief Minister-in Budget a pharh takah Zu zawrh leh lirthei Life Time Tax tihtawp a ni chunga kum hmasa lam aia State sawrkar sum thawhchhuah, State Owns' Tax Revenue pung tura beisei a nih thu tarlan a ni chu sawrkar tan \anlak a ngai nasa dawn hlea an hriat thu an sawi a. Sawrkar hmasa in theihtawp a chhuah avangin sawrkar leiba a tlahniam ve tial tial a, hetih mek lai hian sawrkar leiba chu nakum leh kumleh lam a\angin a pung chho leh dawn niin a lang a, hei hi mipui leh sawrkar tan phurrit a nih theih avangin ngaihtuah chian \ul an tih thu an sawi. Eptu member-te chuan, zirna lam tihmasawn tura Education Budget tihpun a ni chu lawmawm an tih thu sawiin, hei hian zirlaite Result a siam\hat ngei an beisei tih an sawi hlawm a ni.