SEDP hmangin \an lak a ni dawn - Chief Minister

Chief Minister, Zoramthanga chuan Mizoram thil neih hlu ber chu ram a ni a, hemi hmang \angkai hian Delhi lam tlawn reng ngai lo tura a theih chin china intodelh tum a ni dawn a, chumi tur chuan SEDP hmanga \anlak a ni dawn tih a sawi.

Ningani kaltaa Sawrkar kum kalmek 2019-20 chhunga Mizoram sum hman tur ruahman pharh tak sawihona niomin a chhunzawm tlangkawma he thu hi sawiin Chief Minister chuan, MNF kaihhruai sawrkar thar-in tun hi Budget puitling an pharh vawi khatna a ni chungin mi dang pawhin puitling an tih a rin thu leh amah ngei pawhin chhuanawm ve hle a hriat thu a sawi a. Budget hrim hrim chu a sawi chhe duh tan sawichhiat theih tak a nih laiin, fak duh tan pawh fak mawi theih a ni a, India rama awm an nih chhung chuan kal dan pangngaia awm sa chu zawm reng a ngai a, State sawrkar-in sum hmuhna kawngah central a\anga a dawn tur leh an mahni thawhchhuah lakkhawm a\anga tum ve tur a awm a, hei hi an lakkhawm tam poh leh an vannei mai dawn a ni, a ti.

Chief Minister chuan, Sawrkar-in a tum ber chu State sawrkar sum thawhchhuah, Gross State Domestic Product leh mimal sum thawh-chhuah Per Capita Income tihpun a ni tih sawiin, hemi hlenchhuak tur hian sawrkar flagship programme, SEDP hmanga \anlak a ni dawn a, mimal tin thawhchhuah a pun theih nan an mamawh ngaihtuah sakin, a \ul anga hmalakpui an ni dawn a ni, a ti a. Budget pharh taka State sawrkar sum thawhchhuah, State's Own Tax Renevue tihpun a nih chungchangah mi \henkhatin chhiah laksa \henkhat tihtawp a ni chunga hetiang ruahmanna siam an hriatthiam loh thu an sawi chu thil awm tak ni mah se, chhiah a\anga sum lakluh tipung tur hian tui, eng leh Bill dangte \hahnemngai zawka khawn tum a nih thu sawiin, hei hi hlawhtling taka kalpui theih beisei a ni, a ti.

Opposition Group Leader, Lalduhoma pawhin, SEDP chu ZPM thumrawn Policy anga duan a nih avangin \ha an tih thu leh hlawhtling tak tak tura erawh chuan her rem ngai a awm nual nia a hriat thu a sawi a. Finance Department enkawltu Chief Minister-in Mizoram Budget a phar takah nikum lam aia Department 11 enkawlna tur sum dah tlem a ni chu a hriatthiam loh thu sawiin, sum lakluhna tur hriat lawk a ni lo chunga SEDP atan Department sum sawkkhawm a ni chu \ha lo a tih thu a sawi a. Hetiang a nih mek laia Minister-te enkawlna tur zaa 40 chuanga tihpun a ni leh MNF MLA zingah MLA fang awm lova mawhphurhna pe a, sawrkar bul\an ruala hautak taka kal nghal a ni chu pawi a tih thu a sawi. Lalduhoma chuan, Mizorama sawrkar awm tawh zawng zawng zingah MNF sawrkar hmasa khan sum enkawl a thiam lo ber tih sawiin, hei hi phat theih pawh a ni lo, a ti a. Tuna a lan danah chuan kum 5 chhung chu kalphung hluiin an kal leh dawn tihna a nih avangin a lungngaihthlak hle a ni, a ti bawk.