Lenkawl

Ropuiliani Women Farmer Producer Company Ltd. ten Chhingchhip-a MIFCO hmuna Sawhthing, Hmarcha leh Aieng sawngbawlna, Primary Processing Plant an bun chu nimin khan Rural Development & Administration changtu Minister Prof. Lalnilawma chuan a hawng.

Mizo National Front (MNF) Serchhip East Block chuan Forest (Conservation) Amendment Act, 2023 Mizoram-a hman a nih theihna tura Official Resolution chu hnuhkir leh a nih ngei theih nana tawiawm zel turin Serchhip mipuite an sawm.

Govt Serchhip College-a NSS Unit chuan Vawiin, October 31, 2025-a Sardar Vallabhbhai Patel-a pianchampha lo thleng tur puala Unity March neih pualin tunkar Thawhlehni khan an College-a zirlaite pualin ‘Poster Making Competition’ an buatsaih a, a pumpui-ah Lalhruaitluanga, 1st Semester BA chu pakhatna niin Ngurthansangi, 1st Semester B.Sc. chu pahnihna a ni a, Jedda Malsawmzela, 1st Semester B.Sc. chu pathumna a ni bawk. Sardar Vallabhbhai Patel-a piancham pual hian ‘Vigilance Week’ chu hman mek a ni bawk.

Lunglei-a Mizoram State University Demand Committee chu nimin khan thukhawmin Sawrkarin Mizoram State University Bill a lo pawm tawh chu Assembly Session hmasa berah ngaihtuah nawn tur leh Mizoram State University chu Lunglei a dah tura ruahmanna thar siam turin sawrkar an phut tih an sawi.

Chief Minister Lalduhoma chuan nimin khan Shillong-a NEC Office-ah NEC Secretariat-a Sector hrang hranga thuneitute Meeting neihpuiin NEC kaltlanga Mizoram sawrkar hmalaknate leh NEC in harsatna a neihte a sawipui a. NEC-ah hian North East States leh Sikkim State Chief Minister-te chu Council Member an ni a. Hetiang a Council member in anmahni hmun ngeia Meeting a neih pui hi a vawikhatna a nih avangin NEC Member-te leh official-ten lawmthu an hrilh a ni.

MHIP Shillong Branch chuan nimin khan NEC Auditorium-ah Silver Jubilee an lawm a, he hun hi Chief Minister Lalduhoma chuan khuallian nia hmanpuiin Baryl Vanneihsangi, MLA chuan khualzahawm niin a hmanpui bawk a ni.

Vawiin October ni 31, 2025 (Zirtawpni) hi Sardar Vallabhbhai Patel-a pianchamphaphak a ni a, he ni hi India ram pumah inpumkhatna ni, Rashtriya Ekta Diwas (National Unity Day) hman tur niin sawrkar hnathawk te chuan chawhma dar 11:00 ah he ni puala thutiam an chham rual dawn a ni.

Dan lova tawlhruk Sava (exotic bird) nikum a Mizoram-a man leh nikum February thlaa Aizawl Sahuan-a dah, Pesquet’s Parrot chu rukbo a ni tih tun thla ni 29 khan hriatchhuah a ni a, he Sava hi October ni 28, 2025 tlai dar 4:00 leh October ni 29, 2025 zing dar 7:00 inkar vela bo nia hriat a ni. He Sava bo chungchang ah hian Dy. Conservator of Forests, Aizawl Wildlife Division chuan Sairang Police Station-ah FIR thehlutin Wildlife Crime Control Bureau (WCCB), Kolkatta pawh hriattir nghal an ni bawk.

Mizo Academy of Letters (MAL), Joint Headquarters Lunglei leh Department of Mizo, Govt. J. Buana College , Lunglei te tangkawp huaihawtin nimin khan Lunglei-a GJBC Multipurpose Hall-ah ‘C. Thuamluaia Sulhnu Zirhona’ (One Day State Level Seminar) neih a ni a, he hun hi LMC Chairman Lalzuithanga chuan hmanpuiin mithiam hrang hrang ten C. Thuam-luaia chanchin an sawi a, heng thupui an sawi hrang hrangte hi sawihona neih zui a ni bawk.

ZPM Thalaite chuan MNF Party in Total Bandh an huaihawt chu Dampa bial By-Election thlir chunga Mizoram mipuite mithmuha an party lansarh duhna niin an sawi.

Ministry of Science and Technology leh Ministry of Earth Sciences changtun Union Minister Dr. Jitendra Singh chuan Indian Meteorological Department (IMD) in sik leh sa ngun taka an vil thu leh rang taka mipuite hnena hriattirna an chhuah thin chu lawmawm a tih thu a sawi.

Agriculture Minister PC. Vanlalruata’n Mizoram-ah khuarel chhiatna avanga huan thlai chan te tana chhawmdawlna, Crop Insurance Scheme - Pradhan Mantri Fasal Bima Yojana (PMFBY) 2025-26 chu hman thuai a ni dawn tih a sawi.

Lawngtlai District Bawrhsap Donny Lalruatsanga chuan Lawngtlai Chawnhu Veng-ah ‘My Village, My World’ kalpuina tur a puang.

Minister Dr. Vanlalthlana chuan nimin khan Kolasib District-a Taxation Office leh Checkgate te a tlawh.

Health & Family Welfare Minister Lalrinpuii’n Mizoram damdawi In hrang hrangah Pharmacist mamawhna a sang hle tih sawiin, thingtlang lama PHC-ah te chuan Pharmacist post ruak a tam hle a tih sawi.

Nimin khan Minister B. Lalchhanzova chuan Hnahthial District-a Denlung khua ah ‘Lal Vandula Lungdawh leh Lalnu Ropuiliani thlan’ a hawng.

Mizo Zirlai Pawl (MZP) General Hqrs. chuan nimin khan Home Minister K. Sapdanga hnenah Mizoram sawrkar in Inner Line Permit (ILP) Dan an siamthat mekah rawtna an thlen a, Home Minister chuan heng rawtna te hi ngaih pawimawh a nih tur thu a sawi.

Mizoram Larsap General (Dr) Vijay Kumar Singh chuan India ram intodelh leh hmasawn 'Vikshit Bharat' siam turin lungrual taka kan thawhho tlan a tul thu a sawi.

Mizo National Front (MNF) Party chuan nimin khan Forest (Conservation) Amendment Act, 2023 (FCAA) dodalnaTotal Bandh chu Mizoram pumah an buatsaih a, he Total Bandh hi tlai dar 4:00 thleng neih tura ruahman ni mah se nimin chawhnu dar 1:00 khan tihtawp a ni.

Serchhip District-a Bharat Scouts & Guides intawhkhawmna, Grand Camp Fire chu kumin December ni 5 khian neih a ni dawn.

REVENUE DEPARTMENT - Eddy Zosangliana Colney General Secretary (GAD) ZPM Gen.Hqrs, Aizawl

Mizoram Premier League (MPL) Season 12-na ah Mizoram atanga I-League Club pahnih ten Final an khel dawn.

Champhai-a Hnahsin Kut hman zawh takah khan Champhai leh a chhehvel bawra sum che vel leh sum lut chu cheng nuai 1,500 (vbc. 15) vel nia chhut a ni.

Mizoram sawrkar, Synod Revival leh Central YMA in ruihhlo ngaite puala Camping an buatsaih ‘Hulhliap Short Stay Centre’ Camping Batch 5-na chu neih leh mek a ni a, tun tumah hian Camper 120 chuang zet an awm a ni. Hulhliap-SSC Camping hian ni 20 chhung a awh dawn a, Batch hmasa lama chhuak tawh mi engemaw zat chu kutthemthiam zirna (Skill Development Trainning) neihpuiin Sawrkar atanga Certificate hlan an ni bawk.

Champhai Police-te chuan nizan hmasa (Oct. 28, 2025) khan hmeichhe naupang khuaikhema puh vangin Chinsuanpaua (70), Teikhang, tuna New Champhai a awm mek chu an man a, FIR atanga a lan danin Chinsuanpaua hian Oct. 24, 2024 tlai dar 4:00 leh dar 5:00 inkar khan hmeichhe naupang kum 6 mi chu, a thiante nen khawlaia an infiam lai an Inah hruaiin a khawih a, hei hi hriat-chhuah a nih hnuah FIR hi thehluh niin hemi hma hian a lo khawih tawh nia sawi a ni bawk.

Aizawl-a Pachhunga University College-a Japanese Language Study Centre din turin PUC leh JACEEX LL Ltd. Guwauhati te chuan niminpiah khan thawhdunna thuthlung, Memorandun of Understanding (MoU) an ziak a, thawndunna an ziah angin Japanese Language Study Centre hi kum thum (3) chhung kalpui phawt tur niin Japan tawng zirtir tur hian Jaceex lamin Zirtirtu an rawn tir dawn a, PUC-ah zing dar 8:30 atanga dar 9:30 inkarah Class lak thin tur a ni a, nakum January atangin Class hi tan tura ruahman a ni. He MoU hian Japan tawng zirna bakah Japan-a hnathawhna kawnga zirlaite kaihhruaina pawh a huam tel a ni.

Mizoram State University (MzSU) din turin inbuatsaihna kalpui mek a ni a, College kalpuina tur pawh ruahman fel a ni tawh.

Union Minister of State Dr. Jitendra Singh chuan Central Scheme-ten hmun kilkhawr zawk an thlen theih nan hma an lak thu a sawi. Nimin tlai khan Aizawl-a BJP Mizoram Office-ah thuthar thehdarhtute kawmin Ministry of Science and Technology leh Ministry of Earth Sciences changtu Dr Jitendra Singh chuan thalaite tuina lam leh eizawnna ngelnghet an neih theihna tura hma an lak thu a sawi a, khualzin hipa hma sawnna tak tak a thlen theihna tura hma an lak mek thu a sawi a. Hmarchhak State dang anga BJP thlang tlinga BJP sawrkarna siam tura Mizoram chu sawmin, BJP chu thil ti tak tak thin, dawt leh thu belhchian dawl lo sawi mai mai lova a taka hna thawk thin an nih thu a sawi bawk a. Hemi atan hian politician tawnhriat ngah MLA Dr. K. Beichhua kaihhruai Mizoram BJP chungah rinna a nghah thu sawiin, BJP tlin lohna State leh Bial dangah pawh hma sawnna hna thawh chu rualkhai taka kalpui a nih thu a sawi a. Prime Minister Narendra Modi pawhin tum 70 chuang hmarchhak Bial hi a tlawh tawh thu a ...

Meghalaya State-a a cham mek Chief Minister Lalduhoma chuan nimin khan West Jaintia Hills District-a Dawki Land Port chu tlawhin a hmuna hnathawktute nen an inkawm a, Dawki Land Port hi India leh Bangladesh ram te insumdawn tawnna hmunpui a nih bakah ram pahnih mipuite dan ang thlapa an inkalpawhna hmun a ni a. Land Port chhungah hian Integrated Check Post, Cargo Terminal, Warehouse Building, Weighbridge, Passenger Terminal Building, Canteen Facility, Medical Facilty, Forex Counter, Duty Free Shop leh Parking area te a awm a. Land Ports Authority of India hnuaia din niin, kum 2023 khan hawn a ni. Chief Minister hi Land Ports Authority of India-a Regional Administrator TC. Chacko bakah Chief Immigration Officer, Addl Commissioner (Customs) leh sawrkar mi pawimawh dang ten an lo dawngsawng a ni.

Mizoram Police chuan ruihhlo do beihpuim ‘Operation Against Trafficking & Use of Drugs & Narcotics’ thlak tan, September 1, 2025 atanga October 20, 2025 thleng khan ruihhlo chi cheng vbc. 16 chuang hu an man tawh.

Mizoram Universal Health Care Scheme (MUHCS) atan July leh September thla inkar chhung khan Mizoram sawrkar Finance Department-in cheng vbc. 35 a pechhuak.

Rawthing tam avanga Sazu puangin an thlawhhma a tihchhiatsak kuthnathawktu chhungkaw 5622 an tling tawh.

Mizoram Pradesh Congress Commitee (MPCC) chuan Forest (Conservation) Amendment Act (FCAA), 2023 chungchang ah MNF leh ZPM te chu inbei tur bik an awm lo nia sawiin, “Mawhphurtu an ni ve ve,” an ti.

Serchhip tleirawl telna Mizoram Under-19 Cricket Team te chuan Vawiin hian Manipur an hmachhawn dawn. Bharat Ratna Shri Atal Bihari Vajpayee Ekana Cricket Stadium B, Lucknow, Uttar Pradesh-ah Women’s U-19 T20 Trophy 2025-26 chu khelh mek a ni a, he inelna ah hian Mizoram pawh telin Mizoram Team-ah hian Serchhip Chanmari Vengthar-a cheng Lalrindiki d/o R. Lalhmangaiha chu a tel a. Mizoram Team hian an match hmasa berah Nagaland chu Wicket 8-a hnehin an match hnihna ah Sikkim chu run 101 in an sawp leh a, Vawiin hian Manipur an hmachhawn leh dawn a ni.

Sawrkar laipui hmalakna hnuaiah Nasha Mukt Bharat Abhiyan (NMBA)/Ruihhlo Do Campaign chu Serchhip District-a hmun hrang hrangah ngawrh taka kalpui mek a ni.

Serchhip District-a Ruihhlo dona kawnga hmalakna kal mek leh hmalak zel dan tur thlirin nimin khan Serchhip District NCORD chu an Chairman leh Bawrhsap Paul L. Khuma hovin an thukhawm.

MNF party chuan Vawiin October 29, 2025 hian Forest (Conservation) Amendment Act, 2023 dodalna Total Bandh chu Mizoram pumah an nei dawn a, Serchhip-ah pawh Total Bandh hi zing dar 6:00 atanga kalpui tur niin mipuite chu he Total bandh hi thlawp theuh turin an ngen a ni.

Thingtàm vangin Mizoram-a khaw 163-ah Sazu a puang tawh a, Sazu puang hian buh Tin 19,086 (hectare 7,634.754)-a zau lo/huan khawih tawhin, tin 5,835 (hectare 2,331) chuanga buh leh thlaite an tichhe vek a, Thingtàm vanga Sazu puang hi State-Specific Disaster-a puang turin sawrkarin hma a la mek a ni.

Thla thar November 1, 2025 atanga Synod Hospital, Durtlang leh John Williams Hospital, Lunglei-a Mizoram Universal Health Care Scheme (MUHCS) hman a nih theih nan nimin khan Health Minister Lalrinpuii Office-ah Mizoram sawrkar chuan Mizoram Presbyterian Church Synod chu thawhhona thuthlung ‘Memorandum of Agreement (MoA)’ a ziahpui a, MoA-ah hian Health & Family Welfare Department aiawhin Dr. Lalhriat-zuali Ralte, CEO, Mizoram State Healthcare Society leh Mizoram Presbyterian Church Synod aiawhin Rev. R.C. Lalnghakliana, Moderator-te'n an hming an ziak a ni. Health Minister Lalrinpuii chuan Synod Hospital leh John Williams Hospital-ah te MUHCS beneficiaries tana pawisa chawilo - Cashless a  inenkawlna kalpui a ni tur chu lawmawm a tih thu leh mipui tan malsawmna a nih ngei a beisei thu a sawi a ni.

National Commission for Women Member Delina Khangdup-i chuan niminpiah khan Cham-phai District-a Zokhawthar tlawhin Zokhawthar Police Officer-in-Charge SI Zirthanga chuan lo dawngsawng a, India-Myanmar Border a hmun ah tlawhin a enfiah a, Assam Rifles Officer Commanding, Major Nishchal Sharma nen an inkawm bawk. Zokawthar hi International border a nih angin Human Trafficking thleng thei reng a ni a, hetiang kawnga hna thawhpui turin Police leh Assam Rifles te chu Delina Khongdup chuan a sawm bakah hmeichhiate himna leh chawikanna kawnga hnathawh ho dan tur kawng an sawiho bawk.

Nimin khan Khawzawl-ah Bawrhsap leh District Programme Coordinator, K. Vanlalthiana hovin kumin-a Quarter hnihna, July atanga September thla chhunga MGNREGS hnuaia hnathawh thlirletna hun hman a ni a, hmasawn ngaihna leh harsatna an tawh te sawiho niin hmalak zel dan tur te sawiho a ni bawk.

Kum 2025-2027 chhunga Central YMA hruaitu thlan thar te chuan nimin khan an mawhphurhna an la tan a, Aizawl-a Central YMA Office-ah mawhphurhna inhlanna hun hmangin President thar R. Lalngheta chuan Mizoram leh hnam tan a theihtawp chhuah a lungrual taka thawkho a ke pen tlang zel turin a sawm a ni.

Mizoram-a Self-Help Group (SHG) member-te tharchhuah leh siamchhuah thil chi hrang hrang chhinchhiahna tur leh danglamna bik nei turin ‘Selhel’ brand chu buatsaih a nih thu nimin khan RD Minister Prof. Lalnilawma chuan a sawi a, Mizoram-a Self-Help Group nu ho chuan Self-Help tih chu ‘Selhel’ tia an sawi thin avangin Mizo nu ho nihna tarlang thei turin an thil tharchhuah chu ‘Selhel’ brand hnuaiah zawrhchhuah a ni tawh dawn thu leh Ministry of Commerce & Industries hnuaiah an inziak lut tawh tih a sawi a, Thil tul te pawh an tifel tawh a, he brand hnuaiah hian Mizo nute thil siamchhuah, ram dangah pawh zawrh-chhuah tlaka an hriat te chu an zuarchhuak thei tawh tih sawiin, ‘Selhel’ brand lo hmelhriat tur ten Mizoram SHG-te chu a tha zawng chauha an hriat reng theih nan he brand hnuaia an thlai, thei tharchhuahte leh thil chi hrang hrang an siam-chhuahte chu a tha ber ber chauh a nih theih nan thlitfimna leh endikna tha taka kalpui a pawimawh thu a sawi bawk.

Kum 2026-a Chapchar Kut chu March thla Hapta hnihna ah hman tura ruahman a ni.

Art & Culture Department kaltlanga din ‘Committee on Hnam Tobul Zawn Chhuah’ chu nimin khan Aizawl-a CM Conference Hall-ah an Chairman leh Chief Minister Lalduhoma hovin an thukhawm.

Siaha-a awm 20th Battalion Assam Rifles te chuan nimin khan Siaha-a Assam Rifle Camp-ah MJA member te leh NGO te chu Mizoram Territorial Army lak tur chungchang an sawipui.

Nimin khan Aizawl Chanmari YMA Hall-ah Upate pual intihhlimna leh inzirtirna hun buatsaih a ni a, Social Welfare Minister Lalrinpuii chuan a hmanpui a ni.

Health Department-a Food & Drugs Administration Wing chuan ramchhung State thenkhat a damdawi thalo avanga harsatna an tawh mek ang chu kan State a thleng ve thei anih avangin hriselna lama thawktute leh a hmangtu mipuite an fimkhur a pawimawh thu an sawi.

Sawrkar laipui-a Ministry of Ports, Shipping & Waterways changtu Union Minister Sarbananda Sonowal chuan ramchhunga luidung a inkalpawhna tih hmasawn nan Tlawng lui leh Chhimtuipui hmasawnna tur project chu IWT hmalakna hnuaiah tihfel tep a ni tawh tih a sawi.

Mizoram Rural Livelihood Mission (MzSRLM) leh Urban Development & Poverty Alleviation (UD&PA) Department tangkawp buatsaih ‘SARAS Fair’ leh ‘Self Help Group (SHG) Mela 2025’ chu nimin khan Aizawl Lammual-ah neih tan a ni.

Serchhip District chhung Chhingchhip khuaa MIFCO hmunpui chu kar kalta Ningani khan Mizoram University (MZU)-a Commerce Department zirlaite chuan tlawhin an hmalakna te a hmunah an en.

 

Nimin khan ‘Vigilance Awareness Week, 2025’ pualin Sawrkar Pisa hrang hrangah Vigilance Awareness Week thutiam chham rual a ni a, kumin-a he Hapta thupui atan 'Vigilance : Our Shared Responsibility' tih chu hman a ni.

MNF Party ten Forest Conservation Amendment Act (FCAA) 2023 duh lohna leh he dan sut leh tura nawr nana naktuk, October 29, 2025 (Nilaini)-a Mizoram puma Total Bandh neih an tum chu Serchhip-ah pawh zing dar 6:00 atanga tlai dar 4:00 thlengin kalpui tum a ni a. Serchhip khawpui chhunga hmun 9- New Serchhip Kikawn, College Peng, IOC Veng, P&E Veng-a Soil Peng leh BDO Office Peng, AOC Veng, Serchhip Bazar, Darnam Tlang leh Sailiamkawn-ah te Duty Post siam tur a ni ang. He Total Bandh hian Magistrate, Police/Law & Order kengkawhtute, PHE, Health & Emergency Duty Bawnghnute Sem leh Media Persons te a huam lo ang.

Nimin khan Saitual DC Conference Room-ah Saitual District-a Indo-Myanmar Border hungna (Entry/Exit Point) panna kawng siam chungchang ngaihtuahin District Border Coordination Committee chu an thukhawm a, Indo-Myanmar Border hungna (Entry/Exit point) panna tur kawng, Hrianghmun-Tuisa River Approach Road chu ei leh bar atana inkalpawhna kawng (economic road) a ni lo tih he hunah hian tarlan niin, ram venhimna tur kawng (defense road) atana hman a nih dawn avangin mipui chenna hnaiha siam a rem lo tih chu Hrianghmun mipuite pawhin an hriatthiam hram hram a tul thu tarlana ni bawk.

Hnahthial District-a Commerce &Industries Officer (DCIO) chuan The Mizoram Market (Regulation and Facilitation) Act hmangin Hnahthial-a Sa man a bithliah a, heng zingah hian Vawksa chu kg. ah Rs. 400/- niin Bawngsa chu kg. khat zelah a Ti leh a Ir Rs. 550/-; A ti leh a ruh sah pawlh Rs. 500/-; a Thin Rs. 600/- leh a kawchhung Rs. 500/- a ni a, Arsa-ah a sa pangngai Rs. 350/- leh a lu/ke chu Rs. 200/- a ni bawk ang.

Govt. Aizawl College in 'GAC Fest 2025' an buatsaih chu nimin khan PHE Minister Prof. Lalnilawma chuan Mualpui-a an College Campus-a Conference Hall-ah a hawng a, he FEST ah hian dawr 32 hawn niin a tam zawk hi zirlai ten an thiamthil leh theihna an phochhuahna a ni a, dawr hrang hrangte hi Minister hian a fang bawk a ni. GAC Fest 2025 hi October 28, 2025 thleng a neih tur a ni.

Information & Public Relations, Printing & Stationary changtu Minister B. Lalchhanzova chuan nimin khan I&PR Conference Hall, Lianchhiari Rûn-ah Department hnuaia thawktute kawmin Department dinhmun, hmalakna leh hmachhawp te a sawipui a, IPRP&S Department chu mipui nena inngheng reng leh sawrkar hlimthla tilangtu pawimawh tak a nih thu sawiin, hmasawn zel nana pawimawhte thawktute nena inpawhtlang taka sawihona buatsaih chuan rah tha a chhuah ngei a beisei thu a sawi bawk. He hun hi IPRP&S Department Secretary Betsy Zothanpari Sailo chuan kaihruaiin I&PR Director K. Vanlalsangi leh Joint Director Malsawmsanga bakah Printing & Stationary-a Controller Benjamin Lalzama leh Manager, Principal cum Project Manager Er. Vanlal-muanchhana ten an Department chanchin leh an hmalakna bakah hmachhawp te an sawifiah a, zawhna leh chhanna hun te hmangin Minister hian Department hmunhmate fangin hnathawh dante a enfiah nghal bawk a ni.

Chief Minister Lalduhoma kaihhruai High Level Task Force on the North East Economic Corridor chuan nimin khan Online hmangin Meeting an nei a, he hunah hian rawtna an neih tawh te ngaihthlak niin heng zingah hian Bangladesh leh NE State khawpuite inkalpawhna kawngpui lian neih chungchang te, India - Myanmar - Thailand inkalpawhna tur kawngpui chak zawka thawh te, Guwahati chu hmunpuia hmanga Helicopter hmanga NE khawpuite inthlunzawmna tha zawk siam te, Inland Waters Ways pawimawh Barak, Brahmaputra leh a dangte thuamthat te, Rel hmanga hmarchhak khawpuite thlunzawma Rel service man tlawm a awm theih nana Electric Train hman uar te, Internet Service tha zawk leh zau zawk din te, Border Trade Infrastructure din thar leh tihchangtlunna te leh hmarchhak ramte tana product branding awlsam leh market zau zawk siam te leh rawtna dang tam tak a tel a ni.

Mizoram-ah a hmasa ber atan Territorial Army (Home & Hearth)-a tang turte lakna chu thla thar November 15 atanga 25 chhung khian Aizawl Mualpui Salem Veng-a Rajiv Gandhi Stadium-ah neih a ni dawn a, a vawikhatna atan hmeichhia-te tan Territorial Army (Home & Hearth)-ah hian luh theih a ni dawn a ni.

Chief Minister Lalduhoma chuan Mizoram sawrkar-a Engineering Department - PWD, PHE, P&E RD leh IWRD hotute chu nimin khan CM Conference Hall-ah thutkhawm neihpuiin Hnathawh tur hmachhawp an neih zinga an ngaihpawimawh hmasakte (priority list) a sawipui a. Chief Minister hian an ngaihpawimawh hmasak project te chu a thawhna sum ngaihtuahpui hmasak an nih tur thu hrilhin, chutihrualin Project thawhna man tur leh Fund awm thei zat azirin thawh hmasak tur a danglam thei tih a tarlang a ni. He hunah hian Chief Minister hi Adviser to CM TBC. Lalvenchhunga, Commissioner & Secretary to CM Vanlaldina Fanai leh Planning Department Secretary Lalmalsawma Pachuau ten an tawiawm a ni.

Mizo Zirlai Pawl (MZP) kum 90 tlin lawmna leh Zirlaite ni chu nimin khan hmun hrang hrangah hman niin Aizawl-a he ni puala hun hman ah MZP President Dr. C. Lalremruata chuan MZP chu hrechiang lova nuihsawh leh beitu an tam tih sawiin, heng mite hi sawrkar hna a dik lo taka lut te, hnamdang sumdawng mawngzawmpuia hlawkna tel ve te leh an chhungte an ni duh tlangpui tih a sawi.

Dampa Bial-a Assembly by-election neih tur atana inbuatsaihna chu ngawrh taka kalpui zel niin nimin khan 2nd Randomisation of EVM & VVPAT chu he inthlanna a General Observer M.T Reju IAS hovin neih a ni a, he hunah hian Dampa Bial chhung Polling Station 41-a EVM leh VVPAT hman tur 82 te chu khawl hmanga thliarfel an ni. Nimin vek khan Expenditure Observer Shyam Kumar IDAS hovin Candidates-te sum hman dan enfel vawikhatna neih a ni bawk a, he hunah hian felhlel leh diklo hmuh a ni lo a, tluang taka endikna neih a ni.

Comptroller and Auditor General of India (CAG) chuan an report thar berah Mizoram sawrkarin cheng vbc. 4 leh nuai 39 senga Aizawl Zuangtui Veng-a Export Import Business Training Centre (EIBTC) a din chungchang chu na takin a sawisel.

MNF Vice President leh Leader of Opposition, Lalchhandama Ralte chuan kan ram leh hnam tan theihtawp an chhuah zel dawn thu a sawi.

Agriculture & Farmers Welfare Department changtu Minister PC. Vanlalruata chuan Mizoram-ah Crop Insurance an kalpui thei dawn tih a sawi.

Lunglei District Deputy Commissioner (Bawrhsap) bultuma Book Nest Initiative hnuaia Lungsen Aspirational Block-a zirlaite hnena sem tur zirlaibu, thawnthubu leh lehkhabu khawnkhawm te chu nimin khan Lungsen Block chhunga School hrang hranga sem turin Lunglei Bawrhsap Pisa tual atanga vailiam a ni.

 

District Level Children Science Congress chu kar kalta Ningani, Oct. 23, 2025 khan BRC Hall, Serchhip-ah neih niin zirna In hrang hrangte an tel a ni.

Mizoram sawrkar-a Commerce & Industries Department leh National Handloom Development Corporation Ltd. te tangkawp in Mizoram-a puantahtute tana ‘Geographical Indication (GI) Authorised user Workshop’ an buatsaih chu Aizawl, Zuangtui, Sailam, Kanghmun South-ah te neih a nih hnuah Zirtawpni khan Thenzawl-a Handloom Complex-ah chhunzawma zawhfel a ni a, he hunah hian Puantahtu mi 150 vel telin Geographical Indication (GI) leh pawimawhna te zirho a ni.

Mizoram Synod hnuaia Kohhran hrang hrang te chuan October 27, 2024-a Council of Churches in Mizoram (CCM) dinchampha puala October thla Pathianni hnuhnung ber ‘CCM Sunday’ atana hmang tura an tih angin nimin Pathianni khan CCM Sunday hi an hmang a, he hunah hian CCM din chhan leh a thiltum te ngaihthlak niin CCM puala thilpek lakkhawm a ni bawk.

Chief Minister Lalduhoma chuan Mizoram chu Lakshadweep dawta eirukna tlem berna State a nih thu sawiin, kumin chhungin eirukna leh a kaihhnawih thilah ACB chu Preliminary Inquiry tih phalna 10 pek a nih tawh thu leh Regular Case siam phalna 5 pek an nih tawh thu a sawi bawk.

Gauhati High Court chuan NHIDCL hnuaia Kawnpui leh Sairang inkar National Highway 306 siamtu Contractor J. Infratech chu an hnathawh chin leh kawng an siam zawh theih hun tur October ni 31, 2025 ralhma a affidavit hmanga thehlut turin a hriattir.

Tourism Department leh Khawhai khawtlang in an buatsaih Mizoram-a la awm ngai lo Remna Kut, ‘Peace Fest 2025’ chu ni hnih chhung Khawhai-a neih a nih hnuah Inrinni, October 25, 2025 khan a tiak, he hunah hian inremna Sa Ui tanna hun hman a ni.

Mizote zinga India ram chawimawina sang Padma Shri lo dawng tawh, RK. Lalhluna (87) Lunglei, Lunglawn Veng chu Inrinni zing dar 9:15 khan a boral a, nimin khan vuiliam a ni. RK. Lalhluna hian Education and Literature huangah kum 1991 khan Padma Shri dawngin Mizo zinga Padma Shri dawngtu pasarihna a ni. 

MNF party chuan FCAA pawmna Official Resolution hnuhkir a nih leh theih nan Special Assembly ko turin an ngen nawn leh.

Mizoram Mathematics Society (MMS) leh Mizoram Science, Technology & Innovation Council (MISTICS) buatsaih State Level Mathematics Competition vawi 17-na chu Inrinni khan zirlai naupang Class V, Class VII leh Class XII zirlaite tan Mizoram-a Centre 15-ah neih a ni a, zirlai 4482 ten Exam an hmachhawn a ni.

National Health Mission (NHM), Health & Family Welfare Department, Govt. of Mizoram leh SELCO Foundation tangkawp chuan Mizoram chhunga Health Centre zawng zawngah Ni zung chakna hmanga power siamchhuahna a bun kim tawh a. H&FW Department-a Joint Secretary Lalnunmawii chuan SELCO Foundation ten Mizoram chhunga District hrang hranga Health Centres hmun 530- Sub-Centre/HWC 379, Primary Health Centre 69 leh Health Clinic 82-ah te Solar Power System dah a nih thu a sawi a. Heng te hi nau neih leh naupang hriselna, hri danna leh thildangah awlsam zawkin an hmang tangkai thei tawh ang tih NHM hotute chuan sawiin, Ni zung chakna siamchhuah belhkhawm mi 1.1 Megawatt a ni a, hei hian kum 20 chhunga boruak thiang-hlim lo tonne 53,260 hu vel siamchhuah tur chu a ti bo dawn niin an sawi bawk.

Mizoram Larsap General (Dr) Vijay Kumar Singh chuan nimin zing khan 'Great Himalayan Connect: Run the Ridge -Connect the Peaks-Unite the Spirit' tih thupui hmanga 'Sikkim Soldierathon 2.0' (Hill Half Marathon) buatsaih chu Gangtok-a Paljor Stadium-ah telpuiin Soldierathon-a tel mi 2,700 te chu a vailiam a, intihsiakna a titha te lawmman semna hun a hmanpui bawk.

Tunhnai a Lai Autonomous District Council (LADC) sawrkar in Kaladan Multi Modal Transit Transport Project (KMMTTP) hnuaia zang-nadawmna beisei mi 138 te ram pass a cancel chungchangah Lawngtlai District Land Owners Association chuan ram pass dik tak nei mi 138 nen ngaih pawlh loh an duh thu an sawi.

Mizoram Sawrkar hnuaia State Tax hotute chuan GST kalphung thar zawm tha duhlo sum-dawngte laka khauh zawka hmalak a nih theihna atan hemi bawhzuitu tur Quick Response Team an din thu an sawi.

Mizoram sawrkarin September 1, 2025 atanga ruihhlo do beihpui, ‘Operation Jericho’ a kalpui hnuah Mizoram-a Heroin lut a tlem nia hriat niin a man erawh a san phah thung nia hriat a ni.

Zomi Cultural Society General Hqrs. Mizoram leh Zomi Cultural Society Aizawl Joint Committee tangkawp buatsaih 'Khuado Pawi 2025' chu Inrinni khan Bawngkawn South YMA Hall-ah hman a ni a, he hun hi Agriculture Minister PC. Vanlalruata chuan khuallian nia hmanpuiin Mizoram chu Zofate Jerusalem a nih avangin chhim, chhak, hmar leh thlang atangin kan kalkhawm a, kan chengho bawk a, Mizoram tan thil tha ti a malsawmna ni tura tangho turin kalkhawmte a sawm a ni. 

Food Corporation of India (FCI) hotute chuan Mizoram-a FCI Kudam paruk-ah buhfai Metric Ton sing hnih chuang chhêkkhawl a nih thu sawiin, Mizoram sawrkar chu FCI hotute ILP exemption an pekna huang zauh tura an duh thu an sawi bawk.

Art & Culture Minister C. Lalsawivunga chuan Inrinni khan Falkawn Zokhua-a Mizo Typical Village-ah Art & Culture Department buatsaih ‘Living Museum’ a hawng.

November ni 11,2025-a Dampa Bial by-election lo awm tura Candidate mi 5 zingah Indian National Congress (INC) Candidate John Rotluangliana a hausa ber a. Mizoram Peoples Conference party Candidate K. Zahmingthanga chu a rethei ber thung.

 

Nimin khan Serchhip Mat Phai-a Zau hrang hrangah Thingtam avanga Sazu puang mek suat nan Sazu hrai beihpui thlak a ni.

Nimin khan Little Flower Convent School (LFCS) Serchhip chuan ‘Parents' Day’ an hmang a, he hun hi Serchhip Bawrhsap Paul L. Khuma chuan khuallian niin a hmanpui a ni.

Nimin khan Serchhip-ah Bawrhsap Paul L. Khuma hovin PARAKH District Level Dissemination Committee chu thukhawmin hmalak zel dan tur hrang hrang an sawiho.

Serchhip District Anti-Tobacco Squad te chuan nimin khan Serchhip khawpui chhunga Dawr hrang hrangte enfiahin Vaihlo leh a kaihhnawih zuartu ten an sumdawnna hmuna an tar ngei ngei tura Dan in a phut te an zawm that leh zawm that loh an enfiah a. COTPA Dan chuan Vaihlo leh a kaihhnawih zawrhna hmun te hi kum 18 tling lo te hnena Vaihlo leh a kaihhnawih atanga siam thil chi hrang hrang hralh chu Dan bawhchhiatna a ni tih poster tar ngei turin a ti a. He Dan hi zawm a nih leh nih loh enfiah niin lo tar lo te chu an dawr leh sumdawnna hmunah te an tar sak nghal zel bawk a ni.

MNF party ten tun thla ni 29-a FCAA hman ve duhloh lantir nana Total Bandh neih an tum chu Serchhip-ah pawh kalpui ve turin ruahmanna siam a ni a, Vawiin hian Serchhip East Block MNF chuan thutkhawm neiin Total Bandh an kalpui dan leh tul hrang hrangte an ngaihtuah dawn a ni.

Thenzawl-a Police Training School (PTS) chuan Police Commemoration Day, 2025 pualin nimin khan Serchhip District Hospital Blood Bank-a dah turin thisen Unit 36 an pe a, thisen petute hi mipa vek niin Serchhip Blood Bank-a thawktu ten Thenzawl-a PTS-ah kal chilhin an thisen hi an lak sak a ni.

Mizoram Stenographers Service Association (MSSA) chuan nimin khan Aizawl-a I&PR Auditorium-ah Annual General Conference leh an kum 50-na, Golden Jubilee lawmna hun an hmang a, Mizoram Stenographers Service Association te hi Office leh Officers' Chamber tina PA/Sr. PA/PS/PPS/Sr.PPS hna thawk thin te niin tunah hian Member 163 an awm mek a, Affiliated member 2 awm bawkin an vaiin mi 165 an awm mek a ni.

Mizoram Veterinary Service Association (MVSA) chuan nimin khan AITI, Selesih-ah an kum 50 tlinna, Golden Jubilee lawmin AH & Vety Minister C. Lalsawivunga chuan khuallian niin a hmanpui a, MVSA ten kum 50-na an thleng thei chu a lawmpui thu swiin, Mizoram ei leh bar a kan intodelh theihna tura an thiamna leh finna te hmanga, ram leh hnam tana thahnemngai taka thawk zel turin a fuih bawk. MVSA hi a tirah 'The Vets Association of Mizoram' tiin October ni 15, 1975 khan din a ni a, April 22, 1999 khan an pawl hming hi thlakin tun thlengin Service Member mi 169 an awm a, tun dinhmunah post 115 awmah thawk lai mi 76 an awm a ni.

Nikum (2024) July thla atanga kumin (2025) September thla thlenga dan lova ramdang atanga Sikret lakluh Champhai District-a an man te chu nimin khan Controller of Legal Metrology thupek leh District Magistrate hriatpuina in Legal Metrology Office tual, Champhai Vengsang-ah tihchhiat a ni a, heng Sikret an man te hi packet 1,50,000 niin brand hrang hrang a ni a, tualchhung a hralhna rate a chhutin cheng nuai 150 man vel nia chhut a ni. Heng Sikret te hian Legal Metrology Act, 2009 an zawm loh avangin Rule 19 hnuaia Sub-Rule (4) & (6) Legal Metrology (Enforcement ) Rule, 2010 hmangin Controller of Legal Metrology in Disposal order a chhuah hmanga tihchhiat a nih thu tarlan a ni.

Mizoram chak lakluhna kawngpui Aizawl- Silchar National Highway lirthei zawh hleih theih loh khawpa chhia chu nimin khan Mizoram Truck Owners Association (MTOA) chuan a hmunah an en a, Khamrang leh Kawnpui inkar kawng zawh chhuakin an pawl President B. Lalzarzova chuan Zoram mipui chak lakluhna ber heti tak maia a chhia chu hriatthiam har an tih thu a sawi a, kawng siamtu tur chu NHIDCL a ni emaw, sawrkar a ni emaw, an harsatna tawh chu sutkian tul an tih thu leh ruahtui a hul hnua hmalakna chu an ngaihven reng thu a sawi bawk a ni.

Lai Autonomous District Council (LADC) Sawrkar chuan Kaladan Multi Modal Transit Transport Project (KMMTTP) kawngpui sial in a tihchhiat nia insawi ram neitu 138 te ram Pass chu tunkar Nilaini khan a cancel.

Mizo Students’ Union (MSU) chuan Mizoram chhunga Dan lo a khaw din awm mek te chu kumin chhung ngei a tihtawp a nih theih nana hma la turin Mizoram Sawrkar an ngen.

Thla thar November 11-a Dampa Bial-a Assembly by-election neih tura chuh tura hming pelut te tana inhnuhdawh theih hun chu nimin tlai dar 3:00 khan a tawp ta a, inhnukdawk an awm loh avangin he inthlanna ah hian Candidate mi 5 an awm dawn ta a ni.

Kolasib-a Lirtheia eizawng pawl hrang hrang Joint Action Committee chuan Mizoram sawrkarin Petrol leh Diesel man a kawng siamna tur Chhiah an lak chu State Highway chauh a hman a nih tur thu PWD Minister in a lo hrilh tawh a, hei hi an chhawr ve loh avangin a man hmasa anga Petrol leh Diesel man tihniam turin thuneitute hnenah an lo thlen tawh tih an sawi.

Sakawrdai khuaa YMA Inkhawmpui Lian vawi 75-na neih chu nizan hmasa khan zawhfel a ni ta a, kum 2027-ah YMA Inkhawmpui Lian hi Vairengte-ah neih leh tur niin kum 2025-2027 chhunga YMA Kumpuan atan ‘Ruihhlo Do’ tih chu thlan a ni bawk.

Serchhip District Hospital sak hna thawh a nih avanga Khum indaihlohna sutkianna atana Khum 20 awm theihna tur Building thar sak hna chu nimin khan thawh tan a ni a, he Building hi Serchhip Joint VC te hmalakna a sak tur niin a sak hna pawh hi an kutken nghal dawn a ni.

Serchhip District-a raltlan awm mek te tana Biometric Enrolment kalpui chu zawhfel thaw-khat ni tawhin mi 910 chhinchhiah an ni.

Serchhip District Amateur Taekwondo Association (SDATA) Academy chuan Inrinni khan Serchhip-ah Taekwondo Colour Belt Promotion exam buatsaihin zirlai 42 te Exam an hmachhawn a, Aizawl atangin Chief Examiner Albert Lalrinfela, 3rd Dan Black Belt, Lalhminghlua, 2nd Dan Black Belt leh Vanlalruatii, 1st Dan Black Belt ten Exam hi an buaipui a, Mizoram Amateur Taekwondo Association (MATA) Chief Technical Director Master VL Sawma leh Deputy Chief Technical Director Master Joseph Thansanga ten Exam hi an vil bawk a, an Exam-na te hi uluk taka enin thla khat hnu velah result a chhuak ang. Tun tuma Belt Exam neih rual hian MATA hmalakna kal mek ‘Taekwondo Promotional Tour’ nei nghalin MATA leh SDATA hruaitute hi inkawmin an hmalakna te an sawiho bakah hmalak zel dan turte an sawiho bawk a ni.

YMA Inkhawmpui Lian vawi 75-na chu zanin hian Sakawrdai-ah neih tan a ni dawn a, he huna tel tur hian Serchhip atang pawhin Vawiin hian Palai thahnem tak chuan Sakawrdai hi an pan dawn a ni. Kumin a YMA Inkhawmpui Lian neih turah hian Sub-Hqrs. YMA Serchhip atangin Hruaitu hlun chawimawina dawng tur mi 16 awmin heng te hi Thuthmun Branch atangin mi 6, Tuichangral South Group atangin mi 4, Vantawng Group atangin mi 4 leh Tawitlang Group atangin mi pakhat te an ni. Kumin a YMA Inkhawmpui Lian-ah hian Sub-Hqrs. YMA Serchhip atangin Malzai-ah mi 5 an tel dawn bakah Sub-Hqrs. YMA Zaipawl te an zai dawn bawk a, Chhiahtlang-a YMA Branch panga (5) Joint Committee chuan kum 2027-a YMA Inkhawmpui Lian chu thlen an dil dawn bawk a ni.

Ministry of Development of North Eastern Region (DoNER) tarlan danin Thenzawl-ah Heliport leh Helipad din tura ruahman a ni. Ministry of DoNER tarlan danin Thenzawl-a Heliport leh Helipad din tura ruahman hi North East Special Infrastructure Development Scheme (NESIDS) hnuaiah niin cheng vbc. 12 ruahman a nih thu an tarlang a, hei hian State chhunga inpawhna tha zawk a siam beisei a ni tih sawiin, Tourism tih hmasawnna atana kawng pawimawh tak anih bakah rikrum thilah a tangkai dawn tih a sawi a. ni. Ministry of DoNER sawi danin he hmalakna hian zinmi te tan kawng awlsam zawk a thlen dawn a, Mizoram hmun hrang hrang tlawh theihna kawng awlsam a siam sak dawn thu pawh sawiin, sawrkar laipui hmalakna hnuaiah hmarchhak Bial-ah hmasawnna tam tak thlen a ni tih an sawi bawk.

Mizoram Tipper Association, District Hqrs. Kolasib leh Joints Action Committee te chuan nimin khan thuchhuah siamin tunkar Ningani zing dar 7:00 atanga Pathianni tlai dar 4:00 thleng khian Vairengte - Sairang leh Bairabi - Kolasib inkar kawng an dang dawn tih sawiin, National Highway 306 leh 06 kawngpui enkawltu NHIDCL leh Mizoram sawrkar chu tun aia chak zawka kawng chhe lai thawm tha turin an phut tih an sawi a, Mizoam châk lakna kawngpui Vairengte - Sairang leh Bairabi - Kolasib inkar kawng khuar laite hnawh hna leh thawmthat hna chu thawh mek ni mah se, an hnathawh a chak tawk lo hle a, tun anga an thawh reng chuan Mizoram kawngpui pawimawh hi kumin mai pawh ni lo, nakum Fur hma pawhin an siam zawh a rinawm loh thu leh nakum ah phei chuan tun aia a chhiat nasat zawk an rin thu an tarlang bawk a ni.

Aizawl North-II Bialtu MLA K. Sapdanga hovin nimin zing khan a Bial chhunga Hunthar Local Development Committee thutkhawm chu Hunthar YMA Committee Room-ah neih a ni a, Bialtu MLA chuan Local Development Committee din a nih chhan leh a thil tum tlangpui sawiin, Ceng hmasawnna tura thahnem ngai taka thawk ho turin member-te a sawm a, Committee member-te pawhin Bialtu MLA ruahmanna lawmawm an tih thu sawiin, MLA Fund leh UD&PA atanga vengchhung hmasawnna hna thawh tur hrang hrang an sawiho a ni.

People's Conference (PC) Party thla thar November 11-a Dampa Bial-a Assembly by-election neih turah an Party Vice President nilai K. Zahmingthanga chu an Candidate a ni dawn tih nimin khan an puang a, amah hi Sakawrtuichhun Veng-a khawsa niin Vawiin hian he inthlan chuh tur hian hming a pelut dawn a ni. Tarlan tawh angin Dampa Bial-a Assembly by-election neih turah hian Vawiin thleng hian inthlan chuh tumte tan hming pekluh theih a ni dawn a, nimin thleng khan mi pali ten hming pelut tawhin heng hming pekluh te hi naktuk-ah enfiah nghal tur a ni ang.

Kum 1990 atanga kumin 2024-2025 thlengin Mizoram-ah HIV kai mi 32,544 hmuhchhuah an ni tawh a, Mizoram-a HIV kai hmuhchhuah zawng zawng atangin zaa 63.93 chu mipat hmeichhiatna hman atanga kai niin Inchiuna hmanrua (needle/syringe) inhman tawm atanga kai zaa 30.80 an awm bawk. Mizoram-ah hian a thlawna HIV kai leh kai loh enna hmun, Integrated Counselling & Testing Centre (ICTC) 39 a awm a, HIV kaite enkawlna ART Centre 14 a awm a. District tinah ICTC leh ART Centre awmin HIV Estimation 2023-in a tar an danin Mizoram Adult HIV Prevalence chu zaa 2.73 a ni a, National Adult HIV Prevalence chu zaa 0.2 a ni.

Kumin (2025)-ah January thla atanga October 16 thleng khan Mizoram-ah ruihhlo vanga nunna chan mi 70 chuang an awm tawh a, nikum kumtluan-a ruihhlo vanga nunna chan aiin an tam tawh zawk a ni.

Hnahthial District Horticulture hnuaia Rs. 1,64,30,000 senga Warehouse/Collection Centre, Manager Quarters leh Chowkidar quarters sak te chu zawhfel vek a ni tawh tih Hnahthial DHO JH. Zosiamliana chuan a sawi a, Hnahthial-ah hian cheng nuai 70 sengin Warehouse/Collection Centre sak a ni a, Manager quarters hi Rs. 31,14,000 leh Chowkidar quarters hi Rs. 13,14,000/- sengin sak a ni a, heng bakah hian Cherhlun-ah Rs. 50,02,000 sengin Warehouse/Collection Centre sak zawh a ni tawh bawk. DHO chuan thlai chi hrang hrang Tomato, Brocoli, Carrot, Hot-Pepper, Changkha, Zikhlum leh Dawnfawh chinna atan hactare 30 hman a nih thu leh kuthnathawktu ten Rs. 42,51,000/- an lei thu a sawi bawk.

Lunglei District khawthlang lam-a awm Khawthlangtuipui kam-a khaw hrang hrangten inkalpawh nana tangkai taka an hman thin Lawngleng siam man chu hmanraw man to zel karah san lam a pan ve zel.

Health Department hnuaia State Vector Borne Disease Control Programme (SVBDCP) chuan Aizawl khawpui chhung Veng hrang hrang ah Dengue a hluar thu an sawi a, kumin hian Mizoram-ah Dengue kai mi 398 an awm tawh a ni.

Mizoram-a tlawmngai pawl lian ber, Young Mizo Association (YMA) Inkhawmpui Lian vawi 75-na chu zanin hian Sakawrdai-ah neih tan a ni dawn a, he Inkhawmpui Lian-a tel tur Palai tam ber te chuan Vawiin hian Sakawrdai hi an pan ang.

Chief Minister Lalduhoma chuan MNF party chu kan ram felna tur ni lo, kan buaina tur buaipui char char ah puhin, Total Bandh te hial siam an tum chu thil nuihzatthlak tak a nih thu a sawi bawk.