Aizawl City Centre sak hna zaa 67 zawh a ni tawh

Cheng vbc. 42.83 senna tur Aizawl Bazarpui (New Market)-a sumdawng 1,105-te lenna tur sak mek, Aizawl City Centre chu tun thlengin hna thawh tur zaa 67 sak zawh a ni tawh.

Aizawl City Centre sakna atan hian Nov. 16, 2022 atangin sumdawngte inthiar chhuakin hemi hnu hian hna hi thawh zui a ni a, Aizawl Smart City hotute chuan tun thlengin building sak hna hi zaa 67 thawh a nih tawh thu leh a theih anga chakin hmalakna kalpui mek zel a nih thu an sawi a. Aizawl City Centre sak hna hi January, 2023-ah tan niin November, 2026-a zawh tura ruahman a ni.

Aizawl City Centre sakna tur atan hian Urban Development & Poverty Alleviation (UD&PA) chuan Sept. 22, 2022-ah LoA (Letter of Acceptance) pechhuakin a sakna sum hi Smart City Mission atangin cheng vbc. 42.83 dah a ni a, Project hming chu ‘Modernisation of Bara Bazaar - Trade Facility-cum-Exhibition Area’ tih niin design siam turin intihsiakna buatsaih a nih hnuah Catalyst Architecture thlan a ni. He Building hi Block hnih-ah then a ni a, a hnuai ber parking leh Cold Storage-a hman tur niin, Parking-ah Two Wheeler 79 leh Four Wheeler 31 a leng thei dawn a, Block A chu chhawng sarih tur a ni a, dawr 458 a awm ang a. Block B-ah dawr 647 a awm bawk ang a, Block B hi chhawng ngaa sak tur a ni bawk.