‘My Village, My World’ kalpuina turin Chawnhu puang

Lawngtlai District Bawrhsap Donny Lalruatsanga chuan Lawngtlai Chawnhu Veng-ah ‘My Village, My World’ kalpuina tur a puang.

Lawngtlai Bawrhsap Donny Lalruatsanga chuan kawng hrang hrangah Chawnhu chu Veng dang ten an entawn tura siam turin tanrualna tha a pawi-mawh tih sawiin, theihtawpa an tanho chuan Veng nuam, Veng Fai, inrelbawlna tha, kawng hrang hrangah entawn turin an siam theih ngei a beisei thu a sawi bawk.

My Village, My World puanzarna ah hian Chawnhu khawtlang a hruaitute leh Kohhran aiawhte chuan Bawrhsap in ruahmanna a neih hrang hrangte an sawiho a, hmalakna atan sulsutu tur Committee dinin, Faina, Ran khuahkhirh leh Ruihhlo laka vengchhung fihlim tur a tih tur hmasa leh bawhzui tur pawimawh te inhrilhfiahin an sawiho nghal bawk a ni.

He huna tel Chawnhu khawtlanga VC, NGO hrang hrang, Kohhran hruaitute te chuan My Village, My World Inkaihhruaina chu chhungkaw tinah sem theih tur a siam nise, thlatin Committee in Vengchhung hmasawnna tur hmalakna thlirho thìn ni se, Veng chhung hmun pawimawh te hriat zung zung a nih theih nan chhinchhiahna tar nise an ti a, Veng chhung kawngpui tihzauh te, tuihawk luankawr khuhna mamawh a nih thu te leh Thingphun uar te chu hmalakna ah telse an ti bawk a ni.