LFCS ten Parents’ Day hmang

Nimin khan Little Flower Convent School (LFCS) Serchhip chuan ‘Parents' Day’ an hmang a, he hun hi Serchhip Bawrhsap Paul L. Khuma chuan khuallian niin a hmanpui a ni.
LFCS Tual-a he hun hman ah hian Serchhip Bawrhsap chuan nu leh pa te pawimawh zia sawiin, anmahni atangin naupang in thil tinreng an zirchhawng thin a, chuvang chuan nu leh pa te pawh inzir zel turin a fuih a. An thusawi te chu naupangin an chhinchhiah thin tih hriaa, an tawngkam hman thlenga fimkhur turin a chah a. “Nu leh pa chu thawkdun kan ni a, kan inlungrualna te kan faten an hmuhin an la rawn inzir ve zel dawn a ni. Kan sawi aiin kan nunin kan fate a kaihruai nasa zawk thin,” a ti a. “Thil kan sawi hmain kan sawi tur ngaihtuah nawn hmasak thin tur a ni a, kan thu sawiin midang a tina thin em tih te ngaihtuah tin tur a ni,” a ti bawk.

Little Flower Convent School (LFCS) hian Band Party nei tharin nimin-a he hun hman a nih hma hian Our Lady of Assumption Church kawt-ah Band Set Display an nei a, hemi hnu hian School tual zawl thleng rimawi tum-a kalin hun hman zui a ni a, zirlai naupang tan an thiamthil chi hrang hrang an entir bakah 14 Assam Rifles Commandant Col. Archit Goswami, chuan khual zahawm nia he hun hi hmanpuiin thu a sawi bawk a ni.