GST zawm lo tan Quick Response Team din a ni

Mizoram Sawrkar hnuaia State Tax hotute chuan GST kalphung thar zawm tha duhlo sum-dawngte laka khauh zawka hmalak a nih theihna atan hemi bawhzuitu tur Quick Response Team an din thu an sawi.

Akashvani Aizawl zawhna chhangin, State Tax hotute chuan GST kaldan thlak a nih chungchangah mipuite pawh an harh thar hle nia an hmuh thu sawiin, Complaint pawh a luh that thu an sawi a, GST kaihhnawih bungraw hralh leh lei chungchangah dan zawm lo an awm laiin, a then erawh dan zawm tha si, hriatthiam tawk loh avanga buaina nei an awm thu an sawi a, Quick Response Team lam pawhin GST kalphung thar inhrilhfiahna atan hun an hman thin thu an sawi bawk.

Deputy Commissioner of State Tax Lalruatpuia sawi danin, kumin September ni 22- a GST in bung thar a kai hma a bungraw zawrh-chhuah tawhte man (price) tihdanglam chu kumin December ni 31 thleng phal a nih thu leh sumdawng te’n a man hmasa thaichhe lova, a bula a man bituk thar chu an ziah mai a ngaih thu an sawi a ni. 

State tax hotute chuan Mizoram chhunga sumdawngte thenkhatte chu chhiah chungchang ah nasa lehzuala an than harh a pawimawh thu sawiin, GST chungchangah pawh sumdawngte aiin mipui lam an harh hmasa zawk ni a an hmuh thu an sawi a, chhiah lak dan leh chhiah chawi dan kimchang taka hriat chu mi tinte mawh-phurhna ni a an ngaih thu an sawi bawk.