Committee on Hnam Tobul Zawn Chhuah thukhawm

Art & Culture Department kaltlanga din ‘Committee on Hnam Tobul Zawn Chhuah’ chu nimin khan Aizawl-a CM Conference Hall-ah an Chairman leh Chief Minister Lalduhoma hovin an thukhawm.

He thutkhawm kaihruaitu Chief Minister Lalduhoma chuan Committee Member te chungah lawmthu sawiin, Sawrkarin a pawmpui tlak hnam tobul leh chanchin kimchang zawk, Mizo hnam peng hrang hrangte huapzo, tunlai thiamna thar ber ber te hmang ril zawka chhui chu tul an tih thu a sawi a. “A tul a nih chuan hnamdang mithiam rawih huamin, Scientific taka chhui a tulna kawngah pawh inhawng takin hma kan la dawn nia,” a ti bawk.

He hunah hian Art & Culture Minister C. Lalsawivunga pawhin he hmalakna hi kan mithiamte rinchhan hmalakna a nih thu sawiin, “A thiam leh tui, inpe taka hnathawk thei tur kan mamawh a ni,” a ti a. Hemi hnu hian Art & Culture Secretary Zodingliani chuan Report pein hmalak dan tur sawiho a ni a, History chhui dan peng hrang hrang hmanga hmalak a nih theih nan a taka hnathawktu tur mithiam fawmkhawm phawt nise tiin Art & Culture Minister C. Lalsawivunga kaihhruaina hnuaiah Art & Culture Department chuan an tam lam bituk nei lovin hnathawk thei tur mithiam lo zawng khawm hmasa se, an inpeih hunah thutkhawm leh nise an ti a. An hnathawhna tur sum leh pai an mamawhte chu Ministry of Tribal Affairs hnuaia Support to Tribal Research Institute atanga hmuh theih beisei a ni bawk.