MNF ten tawiawm zel turin Serchhip mipuite an sawm

Mizo National Front (MNF) Serchhip East Block chuan Forest (Conservation) Amendment Act, 2023 Mizoram-a hman a nih theihna tura Official Resolution chu hnuhkir leh a nih ngei theih nana tawiawm zel turin Serchhip mipuite an sawm.
Heni chungchanga thuchhuah an siamah MNF Serchhip East Block chuan Mizoram Sawrkar (ZPM) in FCAA Mizoram-ah hman ve tura a Adopt duh lohna leh sut leh tura Sawrkar nawr nana Total Bandh huaihawt chu Mizoram hmun dang rualin Serchhip-ah pawh neih ve a nih thu leh Total Bandh buatsaih chhan chu Serchhip mipuite pawhin hriatthiampuiin an thlawp hle nia an hriat thu an sawi a. “Total Bandh chhungin khawlaia chhuak lui emaw, harsatna siam zawngin tumah kan awm lo te kha lawmawm kan ti em em a ni,” tiin Total Bandh hian mi tam tak nunphung a tibuai ang tih an hriat thu leh Serchhip mipuite hriattthiamna leh thlawpna te, an ngenna an zawm sak avangin an lawm tak meuh tih an sawi.

MNF Serchhip East Block chuan Total Bandh an neih chhan ber chu kan ram leh hnam damna tur leh kan ram tan a ni tih hriaa a tawp thlenga Party thinlung dahbo a, he Official Resolution hi hnuhkir leh a nih ngei theih nana tawiawm zel turin Serchhip mipuite an sawm tak meuh tih an thuchhuah ah hian an tarlang bawk.