Dampa Bial-a by-election chuh turin Party pali atangin hming pekluh a ni tawh

Dampa Bial-a Assembly by-election neih tur chuh turin Inrinni thleng khan mi pali ten an hming an pelut tawh a, he inthlan chuh tumte tana hming pekluh hun chu naktuk, October 21, 2025 thleng hian hawn tur niin Party lian te chuan a hrang theuhin he inthlanna hi an chuh dawn niin a lang a, PC Party pawhin he inthlanna hi chuh an tum tih an sawi.

Thla thar November 11-a Dampa Bial-a Assembly by-election neih tur chuh tumte tana hming pekluhna hun chu hawn mekah niin Inrinni khan Indian National Congress (INC) Official Candidate John Rotluangliana leh Mizo National Front (MNF) Official Candidate Dr. R. Lalthangliana te chuan he Inthlanna a Returning Officer, Malsawmzuala PD DRDO Mamit hnenah an hming an pelut a. Nomination paper an thehluh hnua thuthar thehdarhtute an kawmna ah INC Candidate John Rotluangliana chuan he inthlanna ah hian tlin ngei an inrin thu sawiin, Pathian leh mipuite khawngaihna zara a tling anih chuan an kawng chhe lutuk chu hna hmasaa a neih tur thu a sawi a ni.

MNF Candidate Dr. R. Lalthangliana pawhin tun by-election ah hian a tlin ngei a inbeisei thu leh a tling a nih chuan bialtu MLA hmasa hmachhawp la tih puitlin loh te tih puitlin a tum thu thuthar thehdarhtute zawhna chhangin a sawi a. Dampa Bial chu Aspirational District chhunga mi a nih anga thawh tur tam tak a awm thu sawiin, a khaw neitute nen inrawnna zau zawk nei a hmalak zel a nih dawn thu a sawi a ni.

Hetihlai hian People's Conference (PC) Party President Vanlalruata chuan he inthlanna hi chuh an tum thu leh naktuk-ah an Candidate tur hian hming a pekluh dawn thu a sawi a, hemi hmalam hian ZPM Candidate Vanlalsailova leh BJP Candidate Lalhmingthanga te chuan he inthlanna chuh tur hian an hming an lo pelut tawh a, hetianga PC Party in inthlan an chuh ve leh dawn tih an sawi avang hian he Bial-a by-election neih turah hian Candidate mi 5 an awm tling dawn niin a lang.

Election Commission of India duan lawk dan chuan Dampa Bial-a Assembly by-election neih tur chuh tura hming pekluh theih hun hi naktuk, Oct. ni 21, 2025 chawhnu 3:00 thleng a ni a, heng hming pekluh te hi Oct. 22, 2025 chhun dar 11:00-ah enfiahin tun thla ni 24 thleng khian inhnuhdawh theihna hun hawn a ni anga. Thla thar November 11-ah mipui ten Vote thlakin Vote tla te chu November 14-ah chhiar a ni ang.